Tormenta di sneeuw historico na Merca a causa cancelacion masivo di buelo pa Aruba tambe

ORANJESTAD - Un tormenta di invierno extraordinario ta azota actualmente e region Nordeste di Merca,y a afecta Aruba directamente dialuna. No menos cu 14 buelo di Merca a keda cancela dialuna (esta cu nan no a yega ) y consecuentemente 12 buelo cu tabata programa pa bandona Aruba, no ta bandona Aruba. Sea cu no a bay bek pasobra nan no a yega y tabata programa pa bay si, of nan a yega y a keda pega na Aruba. Ta trata di avionan di e parti Nort Oost, manera New York, Newark y Boston primordialmente cu a cancela. 

E TORMENTA

E tormenta a laga mas di dos pia di sneeuw y a provoca situacion peligroso den varios estado. Pa New York City, autoridadnan a emiti e prome alerta oficial di blizzard den casi diez aña. Bientonan cu por yega te na 80 milla pa ora, hunto cu sneeuw pisa, ta crea condicionnan extremo den New Jersey, New York, Pennsylvania, Connecticut, Rhode Island y Massachusetts. Camindanan a bira dificil of impracticable, mientras transporte aerea ta haya interrupcion masivo.

TRAFICO AEREO CASI PARALISA

Segun dato di FlightAware, mas di 5.660 buelo a wordo cancela te cu diabierna atardi den henter Merca. Pa diamars, casi 1.900 buelo adicional tambe ya a keda cancela. Manera nos a bisa caba, aeropuertonan den area di New York City, Boston y Philadelphia ta entre e mas afecta pa e tormenta. American Airlines a indica cu nan ta spera di reanuda operacion di buelo na aeropuertonan di New York y Boston mas laat mainta diamars. Na Philadelphia y Aeropuerto Nacional Ronald Reagan na Washington D.C., operacion a cuminsa normalisa gradualmente. E potret ta cortesia di Ashwin Maduro y ta di un situacion casi similar algun dia prome.