• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Fiscal a exigi 12 luna di prizon condicional pa polisnan cu a tira y mata Ayden Lanoy

ORANJESTAD – Ministerio Publico dialuna mainta a exigi 12 luna di prizon, condicional y 180 ora di trabou comunitario pa e dos polisnan Violenes y Dirksz, acusa di a tira e hoben Aynden Lanoy mata aña pasa. Un demanda cu a pone e mama di e victima, cuminsa yora inconsolable den sala di corte y e tata wak su dilanti den shock cu awa na wowo. Ningun di dos por a kere e loke nan a tende. Esaki pasobra e demanda ta implica cu de facto, e dos acusadonan lo no bay cera, a lo menos cu den 3 aña, nan viola nan temporada di prueba. 

REKISITORIO

E fiscal dialuna mainta a tuma un ora y mei pa presenta su rekisitorio, pa na final e exigi e demanda. “Ningun hende ta riba ley” ta e forma con e fiscal a inicia su rekisitorio, argumentando cu ni si bo ta polis, bo no ta para riba ley. Segun e fiscal, confiansa den comunidad ta hopi importante. E morto, y manera cu e hoben Lanoy a muri, a causa tristesa inmenso y e fiscal a sigura cu e palabranan final di e tata, di diabierna, a keda den mente di e fiscal. A bisa cu e pregunta principal ta si e polisnan a actua den forma corecto. A trata e concepto di monopolio di violencia unda cu polis ta autorisa pa usa violencia si ta necesario pa logra su meta. Pero den e caso aki, e pregunta ta si esaki ta pisa riba e uso di arma. 

LEGALMENTE PROBA

E fiscal a sigura cu echos, den cuadro legal, a keda proba cu e polisnan a actua robez. Pa esaki, mester a huzga si tin un razon huridico pa no castiga e polisnan pa e uso di nan arma reglamentario. Aki a conclui cu e polisnan pues ta culpable. A trata e pensamento di ki ora un polis mester usa su arma y ki ora no. A splica cu e motibonan cu e polis por usa su arma, ta hopi limita. 

MAMA EMOCIONAL

Ora cu e fiscal a cuminsa repasa e detaye di con, a base di reconstruccion di e caso, e tiramento a tuma lugar, y con e bala mortal a penetra e hoben, y tur e daño cu e bala a haci den e curpa, drentando e curpa di un banda, perforando un ader principal, pulmon y curazon, y bandona e curpa, causando un sangramento interno, e mama no por a contene su mes. Scucha e detayenan aki sangriento aki, a pone cu e mama a drenta den un estado emocional, cu e huez a para e caso pa wak si e mama kier a bandona sala pa recompone su mes. Pero e la opta pa keda y e fiscal a continua cu su rekisitorio. Fiscal a mustra cu den apenas 10 seconde, polisnan a los 20 tiro, cu e resultado conoci. A splica exactamente unda tur e balanan a penetra, y cu a logra recupera e bala ‘culpabel’, cu sanger di e hoben ainda na dje, pega den e auto. Esaki a establece cu esey tabata e bala fatal y despues a determina (manera cu a presenta diabierna caba) cu e bala ‘culpabel’ a bin di e arma di e polis Dirkz (esun cu a los 17 bala riba e auto).   

NO TIRA RIBA AUTO MOVIENDO

Mientras cu e fiscal a alega cu polis no a tira y mata e hoben Ayden intencionalmente, e actuacion no ta conforme loke un polis ta siña pa haci. A splica p.e. durante e studio pa bira polis, nan ta siñabo cu mester evita semper pa tira riba auto cu ta moviendo (coriendo), pasobra e chens ta hopi grandi cu esaki por resulta den un situacion fatal. Y sigur den e distancia minimo di 5 meter, y e chens como tal pa tin herido, ta grandi. Y esaki tambe a sosode, te cu e la resulta fatal.  Tambe e fiscal a mustra cu e polisnan a actua conciente, cu ta cay bou di e termino di ‘intencion condicional’ osea ‘voorwaardelijk opzet’. Y den e caso aki, a proba tambe complicidad. Mientras cu ta un polis (Dirksz) a los e tiro mortal, ta tur dos polis a tira. De echo, ta Violenes tabata e asina yama patrouile leider (lider di patruya), y ta esun cu a cuminsa cu e tiramento. Mientras cu tin e conclusion cu ta papia e ora di medepleging doodslag osea complicidad den homicidio involuntario, no ta relevante ken a tira e tiro mortal. Dirksz ta haya ‘homicidio involuntario’ y Violenes ta haya complicidad den homicidio involuntario. Pero den castigo, esaki no ta relevante y tur dos a haya e mesun castigo,.

A ACTUAL LEGAL?

Fiscal ademas a haya cu e polisnan no a actua conforme ley ora cu nan a saca nan arma y tira. Esaki pasobra no tabatin menasa cu e victima tabatin arma y of tabata peligroso. E unico delito cometi, ta cu e victima no a para su auto ora cu polis a ordena pa haci tal, y cu e no a para durante e persecucion. Esey ta ‘simplemente’ un violacion di trafico, pero no algo penal. Conclusion ta e ora cu e polisnan no a actua conforme ley. 

DEFENSA PROPIO

Polisnan den nan defensa lo a usa e tema ‘noodweer’ osea defensa propio, pa nan caso. Pero pa esaki, mester establece cu realmente tabatin un menasa. E version di polis manera cu por a tende diabierna, ora cu huez a cuestiona e polisnan, ta cu nan a sinti nan mes menasa pa nan bida. “E echo cu bo ta teme y tin miedo pa bo bida, no ta suficiente pa aplica ‘noodweer’. Esaki pasobra contrario na un caso ora cu un ciudadano resorta na uso di defensa propio, osea noodweer, ta cu pa un agente policial, e ta funciona diferente. Un polis mester por contene su mes bou di situacionan asina, ta entrena pa situacionan asina, y ta solamente ora cu p.e. e persona contrario tin un arma sea di candela of cuchiu, of ta conoci di ta un persona peligroso conoci, e ora e por resorta na usa su arma reglamentario como defensa propio. Y e motibonan pa e uso, ta hopi limita. Ademas, imagenan di video, manera cu a keda mustra y trata detayadamente, ta msutra cu e polisnan no tabatin derecho pa usa e arma. Como tal, ta rechasa e defensa di ‘putatief noodweer’. E comentario cu e polis a ‘spanta’ ora cu e la tende e prome tiro, te pa kere cu e tiro a bin di e victima, no por. ‘Un polis no por spanta asina’. 

DAÑO Y PERHUICIO 

A trata tambe na final e parti di daño y perhucio unda cu gran parti di e demanda financiero e la concede, manera gasto pa cubri entiero, gasto medico incuri, pero no e gastonan inmaterial. 

DEMANDA

Manera a cuminsa e articulo, a pidi 12 luna di castigo di prizon, condicionalmente, y 180 ora di trabou comunitario. A mustra cu e ta anticipa cu mientras cu e polisnan ta culpable, e la kibra su cabez riba e castigo, y sa cu loke a yega na dje, e polisnan lo hala rosea di ‘alivio’ cu nan no ta bay cera, y cu pa e famia e lo ta un desilucion total pa tende esaki. E ta compronde esaki pero, ta actuando conforme ley, y cu ora cu ta sentencia polis, un castigo asina ta conta diferente. A splica cu si tabata un ciudadano comun, e castigo lo tabata minimal 12 aña di prizon, pero tin cu corda cu polis, tin derecho di carga arma, y a actua durante nan ora di trabou. Ta midi e ora si nan a actua corecto of no. Y den e caso aki, nan actuacion no tabata corecto, pero como cu nan tin permiso pa tin arma, e sentencia ta otro. Si ta un ciudadano comun, e castigo ta pa ‘carga arma ilegal’, ‘tira riba un hende’, y ‘resultado fatal’, pues tur esaki ta conta. Awor ta keda na  huez si e ta bay di acuerdo cu e demanda exigi, of ta desvia y ta aumenta e castigo, of e ta declara e polisnan completamente liber, of ta reduce e castigo mas. Na April, nos ta haya sa.