ANALISIS: Amienda di LIM ta viola Statuto y no por wordo ratifica

Scirbi pa  Tito Laclé

E siman aki Gobierno di Aruba a informa presidente di Parlamento cu e no por ratifica e concepto di ley di LIM, esta e Landsverordening Instelling Ministeries) y tur, debi na un amienda cu su propio miembro di partido, Mike de Meza a entrega. Esaki siendo cu Parlamento a aproba e ley aki caba. Y a haci esaki cu e cambio segun e amienda. Aparentemente, inexperiencia politico y falta di conocemento di nos leynan, a pone cu Parlamento a ‘dal su dede den e caso aki (atrobe). Door di e falta di conocemento aki, e parlamentarionan lo no a mira cu e amienda aki lo a converti e ley den algo imposibel y inconstitucional.

RAAD VAN ADVIES

“ Raad van Advies di Aruba a conclui cu e amienda cu Staten (Parlamento)  a agrega na Landsverordening Establecimento Ministerionan ta huridicamente insostenibel y no por wordo ratifica” tabata e conseho final di un conseho di 15 pagina. Segun e organo consultivo mas halto di pais, e cambio introduci den december 2025 ta drenta den conflicto directo cu Statuto di Reino, Staatsregeling di Aruba y convenio internacional di derecho humano. Algo cu Parlamento lo mester tabata sa supuestamente. 

Si Parlamento a haci nan trabou  debido, y tabatin mas conocemento, nan lo por a ripara cu e amienda a introduci un procedimiento extraordinario pa persecucion y enhuiciamento di minister, ex-minister y miembronan di Staten den Corte Supremo di Hulanda. Pero Raad van Advies ta bisa cu Aruba, como pais autonomo den Reino, tin su propio sistema penal y organisacion huridico. Corte Supremo di Hulanda ta tribunal di casacion pa Aruba, pero no tin competencia original pa enhuicia e funcionario politico arubano, salvo si esaki ta regula na nivel di Reino.

Segun Raad, transferi e tipo di competencia penal aki na Hulanda sin base constitucional ta limita autonomia di Aruba. Y nos kier nos autonomia toch? Ademas, e procedimiento proponi, ta desvia di e Codigo di Procedimiento Penal di Aruba y por afecta derecho fundamental di proceso equitativo, incluyendo acceso na un huez competente y posibilidad di apelacion.

Un otro punto critico di e Raad ta e falta di necesidad. No tin indicacion cu e sistema penal di Aruba no por trata delito di funcion cometi dor funcionario politico. Un cambio tan drastico, segun Raad, mester wordo regula via Staatsregeling of legislacion di Reino, no mediante un amienda den un landsverordening sectorial.

A base di tur e argumentonan aki, Raad van Advies a conseha gobierno pa no ratifica e proyecto-landsverordening cu e amienda inclui. Gobierno a sigui e conseho y a dicidi pa no ratifica e ley, loke ta significa cu e regulacion di ministerionan no ta drenta na vigor.

E caso aki ta confirma un principio fundamental den  structura constitucional di Aruba: responsabilidad penal di mandatario politico mester wordo regula cu respeto pleno pa autonomia di pais y orden constitucional di Reino.

OTRO PROBLEMA PA MIKE DE MEZA?

E pregunta  ta si esaki tin consecuencia pa e gobierno aki. Pakico?  Laga mi splica. E amienda aki a bin di parti di e propio miembro di partido di gobierno AVP, esta Mike de Meza. Hopi ta interprete caba como un otro ‘sla’ contra e parlamentario, cu ya caba tin un ‘appeltje te schillen’ cu e partido, pa a lague for di gobierno, ya cu e no por a pasa screening. Cu esaki, e ta bira un otro ‘strike’ pa e parlamentario?  Por lo menos asina hopi ta wak e asunto. ‘Mike Eman a laga Mike de Meza cay atrobe’, ta loke caya ta papia. Si esaki enberdad ta e caso, tempo lo mustra. Loke tambe e asunto aki ta mustra, ta cu Parlamento mester ta mas prudente cu asuntonan di ley, pa evita cu e ta haye cu situacionan asina unda cu gobierno ta dicidi di ‘no ratifica’ un ley cu Parlamento a aproba, cu un amienda di su propio colega di partido. Un mas for the books!. C’est la Vie?