Gobierno no kier ratifica ley adapta di LIM cu Parlamento a aproba na 2025

ORANJESTAD - Gobierno a informa Parlamento diaranson, cu ‘e la dicidi pa no ratifica e proyecto di ley LIM cu a wordo aproba dor di Parlamento tocante establecimento y asuntonan di ministerionan den relacion cu entrada di un gabinete nobo (Landsverordening Establecimento Ministerionan osea LIM)’ na December ultimo. E motibo ta pa e amienda cu Parlamento a aproba, cu ta cambia e ley di tal forma cu e no por wordo usa asina. Por lo menos, no segun conseho di Raad van Advies. Den gangnan politico ta papia cu esaki ta nifica cu Mike Eman a laga su colega di partido Mike de Meza cay (atrobe), pasobra ta de Meza a entrega e amienda. 

E AMIENDA  

Tabata durante e tratamento publico di e ley riba 15 december 2025, cu e proyecto di ley LIM a wordo cambia mediante  e amienda presenta pa de Meza. Como consecuencia di esaki a incorpora un articulo 14 nobo den e ley, cu provisionnan pa e procedimiento di persecucion y enhuiciamento di minister, ex-minister y miembronan di Staten den Corte Supremo di Hulanda. “ Pa motibo di e caracter drastico di e cambio aki, articulo 22, tercer lid, di e Landsverordening Raad van Advies 2022 a bira aplicabel” gobierno ta sigui bisa. Segun e provisionnan ey, si durante tratamento parlamentario di un proyecto di ley, Parlamento introduci cambionan sustancial despues cu Raad van Advies a haya y a conseho riba e proyecto, gobierno mester consulta Raad van Advies di nobo. Consecuentemente, riba 22 december 2025 gobierno a pidi Raad van Advies conseho. E conseho di Raad van Advies di 11 februari 2026 (RvA 117-25) ta conclui cu e amienda no ta compatibel cu Statuto, Staatsregeling di Aruba y articulo 14 di IVBPR. Pa un splicacion amplio, ta referi na e conseho di Raad van Advies.

NO TA RATIFICA

Gobierno como tal a dicidi pa adopta e conseho di Raad van Advies y a dicidi asina pa no ratifica e Proyecto di ley. Como consecuencia, e aprobacion di e Landsverordening no ta drenta na vigor. Conforme articulo II.5 di Staatsregeling di Aruba, gobierno lo presenta den curso di e aña aki un proyecto-landsverordening nobo pa e establecimento di ministerionan. Pa mira e carta di gobierno, click AKI, y e amienda en cuestion click AKI y pa e conseho di RvA click AKI.