Encuesta entre lectornan di Noticiacla: Participacion den carnaval a baha, pero ta keda gusta

ORANJESTAD - Durante e ultimo siman di temporada di carnaval 2026, Noticiacla a haci un encuesta entre su propio lectornan riba diferente aspecto di carnaval di Aruba. Importante pa subraya atrobe ta cu e resultado no ta representa henter Aruba, sino percepcion den un segmento di poblacion cu ta sigui actualidad y debate publico via Noticiacla. Sin embargo, e datonan ta ofrece un bista interesante riba con un parti di comunidad ta biba carnaval awendia.

E RESULTADO

E resultado principal ta dualistico. Di un banda, 67% di responde-nan a bisa cu nan gusta carnaval awendia, mientras 21% a indica cu nan tabata gusta e carnaval antes pero awor no mas. Esaki ta mustra cu, den e circulo di lectornan di noticiacla, aprecio cultural pa carnaval ainda ta fuerte.

PARTICIPACION

Pero ora mira e participacion activo mes den carnaval, e cuadro ta cambia. Solamente 25% a bisa cu nan ta activo den carnaval, mientras 60% no ta participa, y 27% a indica cu nan tabata carnavalista antes pero awor no mas. Esaki ta mustra un tendencia claro den e grupo encuesta: E gusto ta keda, pero participacion a baha.

PARADA Y MUSICA TA FACTORNAN GUSTA

Motivacionnan pa gusta carnaval — principalmente musica y despues parada — ta confirma cu esencia cultural di fiesta ainda ta atractivo. Esaki ta importante: problema no ta carnaval como concepto cultural. Problema ta con un parti di publico ta percibi e experencia actual. Den debate publico durante ultimo añanan, tema recurrente tabata entre otro, buracheria excesivo, disturbio y seguridad, congestion riba caminda, perdida di ambiente familiar y costo di participacion.

Aunque e encuesta no tabata midí motibo directo di abandono, e patronchi di  “mi ta gust’e pero no pa participa” den e grupo lectornan ta coherente cu e preocupacionnan cu regularmente ta surge den reaccionnan y opinionnan manda na Noticiacla.

PERSPECTIVA

Pa pone esaki den perspectiva correcto: e resultado no ta bisa cu Aruba en general ta kita for di carnaval. Pero si e ta indica cu den un segmento informa y vocal di sociedad, tin un distanciamento creciente entre aprecio cultural y participacion real. Esaki por wordo interpreta como un señal tempran. No necesariamente di decadencia di carnaval, pero di cambio den forma di participacion. Si un parti di publico ta move di participante pa  spectador — of incluso ex-participante — esaki ta merita reflexion pa organizadornan y autoridadnan.

AINDA GUSTA

Carnaval di Aruba, segun e encuesta di Noticiacla, ainda ta gusta. Pero entre un grupo di su propio publico informa, participacion a disminui. Y esaki ta un dinamica cu merita atencion, sin exagera ni generalisa mas cu loke e datonan ta permiti.