IPKO ta cuminsa awe na Aruba cu foco riba geopolitica y finansas di Reino

ORANJESTAD – Awe akin a  Aruba ta cuminsa e Reunion Interparlamentario di Reino   (IPKO), unda parlamentarionan di Aruba, Corsou, Sint Maarten y Hulanda lo papia durante tres dia tocante asuntonan parlamentario den Reino. E prome dia ta concentra riba geopolitica, relacionnan financiero y posicion di paisnan caribense den Reino.

E reunion a cuminsa awe mainta cu un serie di presentacion tocante e desaroyo politico y economico reciente den tur cuatro paisnan. Lidernan di delegacion di Aruba, Hulanda, Corsou y Sint Maarten ta presenta e situacion actual den nan pais y asina ta pone e tono pa e overleg. Despues ta sigui un briefing technico tocante situacion geopolitico den Reino y region, cu atencion pa seguridad y defensa. Tambe tin un presentacion riba e balansa entre supervision financiero y autonomia di paisnan caribense.

E tema aki ta politicamente sensitivo, pasobra Corsou y Sint Maarten ainda ta bou supervision financiero y discusion riba mas autonomia financiero ta bolbe bin dilanti regularmente. Mas despues den programa, atencion ta move pa desaroyo economico y temanan social. Diabierna tin, entre otro, presentacion programa tocante aviacion y turismo, cybersecurity, envehesecimiento di poblacion y adaptacion climatico. Diasabra e overleg lo sera cu un lista comun di acuerdo y un conferencia di prensa.

Resultado di IPKO no ta vinculante, pero nan ta wordo considera direccion importante pa cooperacion den Reino y pa futura decisionnan politico.