Parlamentario (na Hulanda), cu a sinta apenas 3 luna, tin derecho pa 2 aña overbruggings toelage

DEN HAAG - Nathalie van Berkel, e miembro di Parlamento di D66 cu a retira ayera pa un puesto como staatssecretaris y awe tambe a anuncia cu el ta laga Tweede Kamer, tin derecho riba dos aña di wachtgeld, osea overbruggings toelage. Si su salida tabata anuncia un par dia promé, el lo por reclama solamente mei aña. Van Berkel mester a huramenta otro siman como staatssecretaris di Finanzas, pero e soño ey a kibra ayera despues di informacion di e corant Volkskrant cu Van Berkel no tabata honesto riba su CV. Awe el a dicidi pa renuncia tambe como miembro di Parlamento. Ex-candidato staatssecretaris Van Berkel (D66) ta stop tambe como miembro di Parlamento Cu esaki el tin derecho riba wachtgeld, aunke awor no ta cla si Van Berkel lo haci uso di esaki. D66 ta bisa den un reaccion cu esaki ta “algo pa despues”. Van Berkel tabata awe hunto cu su famia y lo dicidi mas despues tocante cobra wachtgeld, e partido ta informa. Loke si ta sigur, ta cu el a keda exactamente suficiente tempu como miembro di Parlamento pa por reclama dos aña di wachtgeld, en bes di mei aña.

TRES LUNA Y CINCO DIA

Esaki ta funciona asina: Miembronan di Tweede Kamer cu a sirbi menos cu tres luna den Parlamento tin derecho riba maximo mei aña di wachtgeld/overbruggings toelage. Pero si bo a keda mas cu tres luna como miembro di Parlamento, e derecho ey ta subi mesora pa minimo dos aña di un beneficio.