Top funcionarionan di gobierno na Corsou lo por gana maximo 386.000 florin

WILLEMSTAD – Mas tarda pa 21 di december 2027, e salarionan di topfuncionarianan den gobierno y empresanan gubernamental na Corsou no mag ta mas halto cu 386.000 florin pa aña. Esaki ta resulta for di Landsverordening Normering Topinkomens (LNT) y un nota di splicacion publica recientemente tocante e proposicion di ley.

E ley, cu a drenta na vigor 21 di december 2022, ta pone limitnan riba e remuneracion di topfuncionarionan den aparato gubernamental y companianan estatal. Pa empresanan gubernamental grandi ta conta un salario anual maximo di 386.000 florin, mientras pa entidadnan gubernamental mas chikito ta conta un techo di 297.000 florin pa aña.

Pa funcionarionan cu na momento di introduccion di e ley ya tabata gana ariba e norma aki, a establece un regla di transicion. Nan salario mester wordo ahusta despues di un periodo di dos aña. Despues, e entrada mester wordo baha den maximo tres paso y den tres aña te na e techo stipula. Esaki ta nifica cu tur top entrada mester cumpli cu e norma legal mas tarda pa fin di 2027.

Na mes momento, gobierno ta considera pa haci un norma mas halto posible pa specialistanan medico. E ahuste ey mester contribui na corta listanan di espera y mehora accesibilidad di cuido di salud. Segun e splicacion, cu esaki ta ser busca pa mantene suficiente capacidad specialistico y pa sigura calidad di cuido di salud.