Pasahero riba JetBlue: A tene nos dos ora den avion riba pista prome cu por a baha

ORANJESTAD – Un pasahero cu tabata riba avion di JetBlue dialuna cu tabatin bommelding ariba, a bisa cu nan mester a keda por lo menos 2 ora riba e avion, prome cu por a baha. Manera ta conoci, Aeropuerto internacional di Aruba tabata sera pa varios ora dialuna, debido na un situacion di seguridad cu ta involucra un buelo di JetBlue cu a sali for di Boston.

CERAMENTO DI AEROPUERTO

E ceramento di aeropuerto a inicia rond di 11:30am ayera dialuna. Tur buelo cu destino na Aeropuerto Internacional Reina Beatrix a wordo desvia, y acceso na terminal a wordo limita.

TESTIMONIO DI PASAHERO

Un pasahero cu a biaha pa Aruba riba e buelo di JetBlue for di Boston a bisa cu, ora nan a aterisa, pasaheronan a wordo mantene riba avion pa mas o menos dos ora prome cu nan a haya permiso pa baha. Eventualmente, el a bisa, nan a wordo laga sali for di avion fila pa fila, mientras oficialnan tabata controla pasaporte y un unidad K9 tabata revisa nan maleta.

JetBlue a emiti un declaracion na NewsCenter 5 dialuna anochi:

“Dialuna, 9 di februari, buelo 473 di JetBlue cu servicio for di Boston (BOS) pa Aruba (AUA) a wordo para na un locacion alternativo despues di aterisa, despues  cu un preocupacion di seguridad a keda reporta,” e aerolinea a scirbi. “E buelo a wordo recibi pa autoridadnan di ley cu a conduci controlnan adicional, y pasaheronan a baha for di avion. Seguridad di nos pasaheronan y tripulacion ta e promé prioridad di JetBlue, y pregunta adicional mester wordo dirigi na autoridadnan di ley.” E aeroliña no a haci mencion cu tabata trata di un bommelding. 

HABRI AEROPUERTO

Pa 4:05 di merdia, oficialnan di aeropuerto a anuncia cu procesonan di pasahero lo bolbe cuminza. Operacionnan di pista tabata spera pa bolbe normalisa pa 5 di merdia. Pasaheronan a wordo aconseha pa verifica cu aerolineanan pa actualisacion di horario di buelo. NOTA: E potret cu ta acompaña e articulo, ta un simulacion di e accionan cu a sosode, basa riba e informacion ricibi, y no ta un potret actual.