Bom melding riba avion di JetBlue a causa conmocion na aeropuerto dialuna merdia

ORANJESTAD – Algo prome cu 1’or y mei, aeropuerto di Aruba a raporta cu e operacion di e aeropuerto ta keda suspendi y cu ningun pasahero por drenta aeropuerto. Esaki pa motibo di un situacion di seguridad pa cu un avion riba pista. Mas informacion aeropuerto no a duna. Un rato despues a resulta cu ta trata di un caso di bom melding, riba un avion di e aeroliña JetBlue for di Boston. Tres ora despues, aeropuerto a informa cu operacionan lo cuminsa bek y cu pasaheronan por cuminsa wordo procesa atrobe. Esey ta nifica tambe cu e melding tabata falso y cu tur cos tabata ok. 

IMPACTO

E impacto sigur ta grandi, mirando cu tabatin por lo menos 3 of 4 avion cu tabata yegando Aruba, cu mester a keda circula riba Aruba, prome cu a dicidi si nan ta baha of ta keda desvia pa Corsou. Un avion sigur a keda desvia mesora. Te na e momento aki, no ta conoci cuanto avion a keda impacta. E situacion tabata fastioso si, den sentido cu e la sosode den e orario ‘peak’, ora cu tur e avionan di Merca tabata sea baha of bandona nos isla. Den e tres oranan, tabatin por lo menos 13 buelo pa yega Aruba y un cantidad casi igual pa bandona nos isla. 

TRAFICO

Pa varios ora, e camindanan pa aeropuerto a keda cera, siguiendo protocol internacional den caso di un bom melding. Esaki ta un noticia den proceso.