• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Isla di concierto of turismo di balor mas halto: Cua vision ta sirbi Aruba mehor?

Scirbi pa Tito Laclé

Aruba ta na un cruce di caminda. Di un banda, Aruba tin un historia fuerte di isla cu a usa concierto di musica como un instrumento pa atrae turista y genera ingreso adicional. Di otro banda, tin un cambio claro den vision di Aruba Tourism Authority (ATA), cu awor ta pone enfasis riba un modelo di turismo ‘mas responsabel, sostenible y regenerativo’. E pregunta cu ta surgi naturalmente ta: cua caminda ta realmente e mihor pa Aruba?

Durante hopi aña, concierto grandi a forma parti di e identidad turistico di Aruba. Festivalnan manera Jazz & Latin Music Festival, Aruba Music Festival y Soul Beach Festival tabata evento di destino, cu no solamente tabata atrae bishitante, pero tambe a crea movimiento economico real. Hende tabata biaha specificamente pa e evento, keda varios anochi den hotel, gasta den restaurant, transporte y otro servicio. Musica tabata un motor di ingreso.

Aña pasa, tur esaki a para. Aruba Tourism Authority a kibra cu e festival cu pa 20 aña a yama Aruba su base. 

ATA, como e autoridad principal di turismo y e enlace central di e festivalnan, a decidi pa retira y a indica cu e isla mester “algo nobo”. Algo diferente. Buscando pa sa e motibo di esaki, mi a bin compronde mientrastanto cu ATA su strategia multi-anual awor ta basa riba un enfoque di tres pilar: turismo responsabel, sostenible y regenerativo. Segun ATA, e isla no ta busca mas pa aumenta cantidad di yegada, sino atrae un proporcion mas grandi di bishitantenan cu ta pensa igual: hende cu ta cuida nan destino anfitrion, cu ta respeta e medio ambiente y cu ta contribui na bienestar di e comunidad local.

Esaki ta un cambio importante. ATA a declara publicamente cu e ta sigui e modelo conoci como uno di High-Value, Low-Impact (HVLI), unda calidad ta mas importante cu cantidad. E mensahe ta cla: mas bishitante no ta automaticamente mihor, y menos bishitante no ta fracaso si e impacto economico y social ta positivo.

Den teoria, esaki ta un enfoke fuerte y moderno. Aruba ta un isla chikito, cu recurso limita y presion creciente riba vivienda, trafico y infraestructura. Turismo masivo sin control no ta sostenible na largo plazo. Den e sentido ey, e vision di ATA tin fundamento.

Pero e debate real no ta si Aruba mester cambia, sino con e cambio ta wordo interpreta.

E peliger ta di pensa cu concierto di musica y turismo di balor halto ta dos cos contrario. Un concierto bon organiza, cu planificacion, curacion y control, no ta necesariamente turismo di masa. Al contrario: concierto di destino ta atrae bishitante cu ta planifica, cu ta keda mas largo, cu ta gasta mas y cu ta mira e isla como un experencia completo, no solamente como un uno cu tin solamente e beach.

Ora Aruba a laga e modelo di concierto sin remplasa esaki cu un producto equivalente, e isla a crea un bacio pa concierto. E bacio ey no ta solamente cultural, sino economico. Ingreso potencial a bay otro lugar. Oportunidad pa diversificacion di turismo a keda sin uso.

E pregunta, asina, no ta si Aruba mester sigui cu e bieu modelo, ni si e isla mester sigui cu e nobo vision di ATA. E pregunta ta: Con Aruba por combina tur dos?

E caminda mas inteligente pa Aruba no ta elimina concierto di musica, ni ignora sostenibilidad. E caminda mas inteligente ta pa integra musica dentro di e vision di HVLI: menos evento, pero mas fuerte; mas calidad, menos improvisacion; mas beneficio pa economia local, cu menos impacto riba isla.

Turismo di balor halto no ta exclui cultura, musica y evento. Si Aruba logra alinia cu su nobo vision, e isla por mantene ingreso, proteha su medio ambiente y fortalece su identidad.

E futuro di Aruba no ta den scoge entre musica of sostenibilidad.

E futuro ta den con nos ta usa musica di forma sostenible, como parti di un strategia di turismo cu ta pensa na largo plazo.