Peterson: Aruba mester adopta ley di proteccion di Naturalesa pa islanan BES

Peterson: Aruba mester adopta ley di proteccion di Naturalesa pa islanan BES

Posted on 02/5/2026 10:05 am AST | Updated on 02/5/2026 10:08 am AST

ORANJESTAD – Aruba mester adopta e ley di proteccion di naturalesa manera cu Hulanda a traha pa islanan BES, pa asina nos tin miho proteccion di ley. Asina presidente di Aruba Birdlife Conservation, drs Greg Peterson a sugeri den e programa Noticiacla LIVE diamars anochi cerca e moderador Tito Laclé. Motivacion di sr Peterson ta entre otro, cu e ley actual di Aruba riba e tereno aki, tin hopi buraco, cu ta evita cu autoridad por actua manera mester ta. 

E SITUACION NA ARUBA

Peterson ta duna como ehempel, e problema di UTV’s cu ta core tur caminda destruyendo naturalesa. Y tin falta di control. Mientras cu ta pone camara tur caminda pa proteccion ora cu hende horta na propiedad. “Nos mester di camera den natuur tambe pa cuminsa” Peterson a bisa. “Ora cu nan core y destroy algo cu ta di Aruba, cierto tipo di mata, cierto animal, whatever, nos ta wak e UTV’s nan ta destrui nos pais, polis tin cu para nan” Peterson a sigui bisa. Problema ta cu niun polis ta actua. “Niun polis ta para nada pa natuur. Nada”. 

LEY TIN BURACO

Segun Peterson, tin por lo menos dos ley di naturalesa, cu ta e.o. e natuurverordening, y bo tin e politie verordening. “Mi a wordo informa di un persona hopi halto den esaki, cu tin yen buraco (cu ta) e problema den e leynan” Peterson a bisa. Esaki ta porta un di e motibonan cu polis no ta of kier of por actua. 

PROPOSICION NA GOBIERNO

Den e programa e ora, Peterson a haci un proposicion hopi audaz den direccion di gobierno. “ Mi ta pidi gobierno, oficialmente den bo programa, awe nochi, por fabor; Tuma e BES wetgeving over, cu Hulanda a traha special pa e BES eilanden, y ban introducie na Aruba”. Segun Peterson tur cos ta cubri den e ley, den un solo tiro, sin haci dificil of straño. Loke  cu Peterson ta referi na dje ta e asina yama  “Wet grondslagen natuurbeheer- en bescherming BES” of Ley di Fundacionnan pa Maneho y Proteccion di Naturalesa BES. 

  • Powered by SETAR