- Miembro di Tweede Kamer ta den studio awe di Noticiacla LIVE
- Aruba y Corsou sugeri como destinacion mas amigabel pa LGBTQ mericano
- Top funcionarionan di gobierno na Corsou lo por gana maximo 386.000 florin
- Analisis: Ora cu cuido pa adulto mayor na Aruba ta mata: Parti I
- Activista di derechonan civil Jesse Jackson (84) a fayece
Conseho AG: Condena di ex-minister Sevinger den caso Avestruz por keda na vigor
DEN HAAG - E condena di ex-minister di Desaroyo Espacial, Infraestructura y Medio Ambiente (y despues di Desaroyo Espacial, Integracion y Infraestructura) di Aruba Benny Sevinger como co-autor di estafa contra e Pais Aruba, comision di soborno pasivo (laga soborna) y malversacion, por keda na vigor. Asina e conseho di abogado-general (AG) Paridaens na Hoge Raad den un di su conclusionnan a publica awe. Segun e AG, tambe e condenanan di dos co-acusado, entre otro pa soborna e minister, por keda na vigor. Loke cu esaki ta nifica, ta cu si Corte di Casacion tuma e conseho aki over, locual ta sosode 99% di biaha, cu sr Sevinger y e otronan cu a apela, tin cu raporta na KIA algun dia despues, pa cuminsa sinta nan respectivo sentencia.
E CASO CONTRA E MINISTER
Hof Comun a determina e siguiente tocante e manera di traha cu estafa. Na nomber di personanan huridico cu tabata den posesion di un di e co-acusado di e minister (un persona afilia cu su partido politico), a wordo presenta cu peticionnan cerca e minister pa obtene derechonan di erfpacht (of opcion riba esaki). E companianan tabata “bashi” na momento di presenta e peticionnan y p’esey casi no tabata tin balor. E proposito di e co-acusado tabata pa, un biaha cu e opcionnan tabata otorga, bende e accionnan cu ganashi halto. E rol di e minister tabata cu e, a pesar di atraso den tramitacion di peticionnan di opcion di tercer persona, casi inmediatamente a duna su aprobacion. Asina el a pone e peticionnan di su co-acusado dilanti y a evita cu e peticionnan wordo evalua administrativamente segun e politica vigente.
Ademas, e minister a acepta donacionnan di su co-acusado durante un periodo unda el mester a decidi riba nan peticionnan pa otorgamento di derechonan di erfpacht. Esaki ta constitui soborno ambtelijk pasivo segun e abogado general. Tambe e minister a usa placa di un fundacion maneha na su nomber, cu tabata destina pa su campaña electoral, pa paga un biahe priva di su esposa, loke segun e Hof ta constitui malversacion.
Hof Comun a condena e ex-minister na 48 luna prizon, di cual 12 luna condicional. Ademas, e Hof a priva e acusado di e derecho pa ocupa un cargo di funcionario publico y di e derecho pa wordo eligi como miembro di organonan representativo general, tur dos pa un periodo di seis aña. E dos co-acusado a ricibi condenanan di prizon di 30 luna, di cual 10 luna condicional, y 24 luna, di cual 12 luna condicional. Tur tres acusado a presenta recurso di casacion contra e sentencianan na Hoge Raad.
KEHONAN DI CASACION
E abogadonan di e ex-minister ta pidi Hoge Raad pa anula e condena. Den casacion ta presenta kehonan contra e prueba di e hechonan penal menciona. Entre otro, a wordo alega cu e minister, como representante di e Pais Aruba, mester wordo identifica cu e Pais y cu e Pais asina no por wordo estafa. Ademas, tocante e malversacion declara, a wordo alega cu for di e prueba no ta resulta cu e acusado a tene bou su posesion un cheque proveniente di e fundacion cu cual a wordo paga e biahe priva di su esposa, ni cu placa di e fundacion a wordo usa pa un otro proposito cu pa cual e tabata destina.
CONCLUSION DI AG
Abogado General Paridaens ta considera e kehonan di casacion infunda. Segun e, Hof a fundamenta suficiente pakico e minister a haci su mes culpabel di e hechonan penal declara. E minister no por wordo identifica cu e Pais Aruba. T’ambe e kehonan di casacion contra e malversacion declara no ta prospera segun e AG. Hof por a conclui cu e acusado tabata tene e cheque bou su posesion y cu e placanan relaciona cu e cheque a wordo usa pa paga un biahe priva di su casa y p’esey a wordo usa pa un otro proposito cu pa cual nan tabata destina.
E kehonan di casacion den e casonan contra e co-acusado tambe ta faya segun e AG.
E AG ta conclui pues cu e condenanan y e castigonan impone mester keda na vigor den tur tres caso.
DESICION DI HOGE RAAD
E pronunciamiento di Hoge Raad ta (provisionalmente) determina pa 14 di april 2026. Un conclusion di AG ta un analisis huridico independiente y al mes tempo un conseho na Hoge Raad, cu ta liber pa sigui esaki of no. E AG ta miembro di e parket na Hoge Raad. E parket na Hoge Raad ta un parti autonomo y independiente di e organizacion judicial y no ta parti di e Ministerio Publico.
Chauffeur femenino di hit & run fatal ta keda deteni pa 90 dia mas
ORANJESTAD - E chauffeur femenino di di hit & run fatal C. Fernandes (24) cu dia 4 di januari ultimo a causa un accidente fatal, lo keda deteni pa por lo menos 90 dia mas. Vocero di ministerio publico Ann Angela a confirma esaki pa noticiacla. E accidente di e dia menciona, a laga dos persona herida fatalmente, y a causa consternacion y rabia den comunidad. Specialmente pa e forma con e accidente a sosode y e resultado despues, den e sentido cu e persona cu a causa e accidente, a core bay despues cu su auto. Despues e persona a keda deteni y no a recobra su libertad mas.
Aruba a pone paso nobo den lucha contra criminalidad di hoben
ORANJESTAD - Procurador-General di Aruba, Alto Comisario di Polis y director di Stichting Reclassering en Jeugdbescherming a firma awe e maneho nobo titula Gezamenlijke Aanpak Jeugdcriminaliteit. Cu e maneho aki e tres instancianan a fiha formalmente con Polis, Ministerio Publico y Reclassering mester actua desde prome momento cu un persona menor di edad drenta den contacto cu husticia. E documento ta describi e afspraaknan di colaboracion entre e instancianan y ta encera liñeanan di maneho pa trata cu sospechosonan menor di edad. E enfoke principal ta riba prevencion: evita cu un hoben, despues di un prome incidente, bolbe drenta den contacto ku polis.
Corte a pospone revision di caso pa libera preso cu cadena perpetua
ORANJESTAD - Corte Comun di Husticia a dicidi awe pa pospone revision di ehecucion di un castigo di prison di bida largo te 31 di augustus venidero. A keda palabra cu tanten Ministerio Publico lo percura pa tene Corte Comun di Husticia na haltura tocante e pasonan cu a tuma caba den cuadro di e revision y tocante e pasonan cu lo mester bay tuma ainda. Awe tabata prome vez cu Corte a trat’e. E persona sirbiendo e castigo di bida largo ta e homber C.A.H., cu a wordo sentencia pa asesinato na aña 2006. Actualmente e ta e unico hende na Aruba cu ta cumpliendo cu un condena na cadena perpetuo.
Corte di apelacion ta trata caso New York cu periodista Speed Andrade na mei proximo
ORANJESTAD – Corte di Apelacion (Hof) a dicidi awe dialuna, cu e ta trata e caso New York, den cual periodista Nelson “Speed” Andrade ta sospechoso y ta acus’e di por lo menos tres cargo, diabierna 22 di mei proximo pa 2’or di atardi. Dialuna (awe) a trata e caso pro forma, unda cu mester a wak si ainda tin peticion di tanto Ministerio Publico, como e sospechoso. Pero di ambos banda, a bisa cu no tin nada nobo. A keda huez nada otro pa e ora solamente stipula un fecha pa trata e caso aki.
Durante reunion di e Hof a tuma desicion tocante propuesta pa President nobo di Hof
WILLEMSTAD - Awe a tuma lugar un reunion di e Hof, unda entre otro tema a wordo trata e propuesta presenta pa e comision di seleccion pa President nobo di Hof, y riba esaki a tene un votacion. Riba base di e resultado di e votacion, e directiva lo recomenda por escrito, conforme cu lo ta stipula den e Ley di Reino, Sigmar Carmelia na e Ministernan di Husticia di e cuatro paisnan. E ministernan lo despues prepara un propuesta oficial pa nombramento pa e Conseho di Minister di Reino. E Conseho di Minister di Reino (incluyendo e gevolmachtigd ministernan di e tres paisnan) lo tuma un desicion final riba e propuesta pa Presidente di Hof. Despues di esaki lo wordo anuncia ken lo bira e Presidente nobo di Hof. Segun expectativa, e propuesta lo wordo trata den e Conseho di Minister di Reino prome cu zomer.
OM ta exigi 30 luna prison pa ex dirigente di Stichting Sportsubsidie Aruba
ORANJESTAD - Corte den Prome Instancia a trata awe e caso penal ‘Bromelia’ contra e sospechoso K.R.V. (30), ex-dirigente di Stichting Sportsubsidie Aruba (SSA). V. su mes no tabata presente den Corte, mirando cu e no ta na Aruba y no a bolbe mas tampoco pa e tratamento dilanti hues. E ta wordo acusa di estafa di SSA, malversacion di fondonan publico, labamento di placa y maluso di funcion.
Follow NoticiaCla
