Merca ta relaha sancionnan contra Venezuela

WASHINGTON – Merca ta relaha e sancionnan contra Venezuela. Companianan mericano por hasi negocio atrobe, bou di condicionnan estricta, cu petroleo venezolano. Esaki por tin consecuencia pa e mercado energetico global. E permiso nobo ta na vigor dede 29 di januari. Companianan mericano por awor extrae, cumpra, bende y transporta petroleo venezolano. Tambe comercio cu e compania estatal di petroleo di Venezuela, PdVSA, ta permiti atrobe. Esaki tabata prohibi anteriormente pa motibo di e sancionnan.

CONDICIONNAN ESTRICTA

Solamente companianan cu ya tabata existi prome januari 2025 por participa. Tur contrato mester wordo cerra conforme cu ley mericano. Pagonan lo bai pa cuentanan special cu Merca ta controla. Companianan mericano por tambe huur barconan, cerra seguro y usa hafnan venezolano. Cambio di petroleo pa otro productonan ta permiti.

LOKE TA KEDA PROHIBI

Na mes momento, restriccionnan importante ta keda na vigor. Pagonan den oro, criptomoneda of via construccionnan di debe ta prohibi. Tambe transaccionnan unda partidonan for di China, Rusia, Iran, Cuba of Corea di Nort ta involucra, ta keda exclui. Barconan sanciona no por wordo usa y activonan congela ta keda blokea.

SUPERVISION ESTRICTA

Companianan mester raporta tur cos: cuanto petroleo, na cua pais y na ken ta paga. E prome raportahe mester wordo entrega den dies dia, y despues cada tres luna. Merca por ahusta of retira e reglanan na cualkier momento. Companianan mester tambe cumpli cu otro leynan mericano. E relahacion parcial no ta significa un eliminacion completo di e sancionnan contra Venezuela, pero ta ofrece companianan mericano atrobe acceso controla na e sector di petroleo venezolano, bou di condicionnan y supervision estricta.