UFA ta reafirma: Agricultura local ta un pilar pa resiliencia di Aruba

UFA ta reafirma: Agricultura local ta un pilar pa resiliencia di Aruba

Posted on 02/3/2026 9:12 am AST | Updated on 02/3/2026 9:18 am AST

ORANJESTAD, Aruba — Na entrada di 2026, United Farmers Association of Aruba (UFA) ta expresa su speransa cu confianza pa e aña cu ta bini y ta reafirma su compromiso pa fortalese produccion local di cuminda como un pilar esencial pa resiliencia nacional. E interrupcionnan cu Aruba a sinti despues di e eventonan di 3 di januari na Venezuela, cu a resulta den cancelacion di hopi vuelo y inseguridat logístico, a sirbi como un recordatorio claro, similar a lo que nos a biba durante COVID-19, di con rapido evento externo por afecta e cadena di suministro di nos isla. E momentonan aki ta mustra cu soberania alimentario mester keda un prioridad estrategico. Aruba no por perde di bista e leccionnan aprendí den tiempo di crisis, ora acceso na importacion por wordo limita y capacidad local bira crucial.

UFA constantemente a enfatisa e importancia di incentiva y proteha nos comunidad di agricultor. Agricultornan local no ta solamente productor di cuminda; nan ta un salvaguardia importante pa Aruba, manteniendo e conocimiento, capacidad y infrastructura necesario pa garantisa continuidad di suministro di alimento ora sistema internacional ta wordo interrumpí. Mientras condicionnan regional ta stabilisá y mercado ta bolbe na normal, UFA ta advertí gobierno y comunidad pa no bolbe cay den un dependencia excesivo riba produccion importa barato. Asequibilidad di corto plazo no mester socava resiliencia di largo plazo. Sosten continuo di politica ta esencial, incluyendo acceso na tera, awa, utilidatnan electrico, financiamiento y tecnologia, asina tambe extension y mehoracion di incentivo fiscal existente cu ta permití agricultornan local keda competitivo pa reinvertí den sistema di produccion moderno, eficiente y sostenible. Esaki lo yuda garantisa cu agricultura local por keda viabel y competitivo na largo plazo. United Farmers Association of Aruba ta mira 2026 cu bon speransa, convenci cu, cu prioridadnan claro y compromiso consistente, Aruba por sigui construí un sistema alimentario mas fuerte, mas auto-suficiente y mas resiliente, cu ta sirbi tanto e agricultornan como e comunidad mas amplio.

TOCANTE UNITED FARMERS ASSOCIATION OF ARUBA

United Farmers Association of Aruba ta representa y sostene agricultornan local, y ta boga pa un sector agricola resiliente, sostenible y competitivo cu ta contribui na seguridad alimentario di largo plazo pa Aruba.

  • Powered by SETAR