Transicion di era despues di Maduro lo ta parti di agenda di hefe di mision di Merca na Venezuela

CARACAS - E transicion di e era despues di Maduro lo forma parti di e agenda di trabou di e hefe di mision di Merca na Venezuela, kende dialuna a tene un prome encuentro oficial cu e presidente interino, Delcy Rodriguez. E mandatario encargada a ricibi Laura Dogu, kende a yega diasabra na pais pa retoma relacionnan cu a wordo kibra na 2019 pa motibo di Nicolas Maduro, kende a wordo destituido y awor ta prizonero na Merca pa enfrenta cargonan di narcotrafico. Dogu ta encabeza e mision mericano como encargada di negoshi. Rodriguez, pa su banda, a nombra Felix Plasencia como representante diplomatico di Venezuela na Estados Unidos. E relacion entre Caracas y Washington a cambia radicalmente cu Rodriguez, kende a asumi poder despues di captura di Maduro durante un operacion militar mericano riba 3 di januari. “Dialuna mi a reuni cu Delcy Rodriguez y Jorge Rodriguez pa reitera e tres fase cu Secretario Rubio a plantea tocante Venezuela: stabilizacion, recuperacion economico y reconciliacion, y transicion”, Dogu a scirbi na spaño riba cuenta X di e embahada na Caracas. E canciller venezolano, Yvan Gil, a bisa cu e agenda di trabou ta involucra “e abordahe di diferencia, di controversianan historico entre e gobierno di Merca y Venezuela”.