KLM: Marjan Rintel propone pa segundo termino como CEO

AMSTEL - E Conseho di Directiva di Air France-KLM a aproba e nominacion di Marjan Rintel como President y Director General di KLM pa un segundo termino di cuatro aña, segun KLM a informa dialuna anochi. E re-nominacion ta sigui riba proposicion di e Conseho di Supervision di KLM y di e Director General di Grupo, Benjamin Smith. Director di Operacion, Maarten Stienen, a indica cu e no ta aspira na un segundo termino di nombramento. E Conseho di Supervision di KLM ya a informa e Conseho di Empleadonan tocante esaki. E confirmacion definitivo di e proposicion lo tuma lugar durante e reunion di accionistanan di KLM. Marjan Rintel ta cumpli e funcion di President y Director General di KLM dede 2022 y a sigui Pieter Elbers, cu a mester laga su posicion segun Smith, pasobra el no tabata riba mes linea cu e direccion di grupo y tabata sigui mas su propio curso. Elbers tabata conta cu apoyo fuerte di e personal di KLM, cu tabata tene el den alto estima.

OPERACION DIARIO

Rintel ta ricibi como tarea, pa e proximo cuatro aña, pa fortalece di manera structural e fundamento operacional y financiero di KLM. Pa esaki, e structura y direccion di e organizacion lo wordo ahusta. E directiva, hunto cu e gerencianan di e divisionnan operacional mas grandi, lo involucra nan mes mas directamente den e operacion diario. Director di Operacion di KLM, Maarten Stienen, a indica cu, riba esaki, el kier duna direccion nobo na su futuro profesional. Segun KLM, e enfoque nobo mester resulta den mas confiabilidad y previsibilidad pa clientenan y empleadonan.

Presidente di e Conseho di Supervision, Wiebe Draijer, ta papia di retonan grandi cu ta keda pa e compania. Segun dje, ta necesario pa haci cambionan profundo pa mehora e resultadonan di manera structural. E Conseho di Supervision tin confianza cu KLM, como parti di e Grupo Air France-KLM, lo por pasa exitosamente door di e transformacion bou di liderazgo di Rintel y contribui na e metanan financiero di e grupo.

Tambe e Director General di Air France-KLM, Benjamin Smith, a expresa su apoyo pa Rintel. El ta indica cu KLM a traha e ultimo añanan den un ambiente dificil riba recuperacion di capacidad despues di e crisis di corona, entre otro door di impuesto mas halto y costonan creciente. Smith ta spera cu e recuperacion di e prestacionnan operacional y financiero lo sigui den e proximo añanan.

DIRECTOR DI OPERACION NOBO

KLM kier simplifica e organizacion, mehora e operacion, aumenta ingreso y baha costonan. Pa esaki, e directiva y e gerencia lo dirigi e operacion mas directamente. E cambionan organizacional tin consecuencia pa e funcion di Director di Operacion. E Director di Operacion actual, Maarten Stienen, a indica cu e no ta mira un lugar pa dje mes den e organizacion nobo. Pesei KLM lo cuminza cu e proceso pa busca un Director di Operacion nobo.