Gabinete Jetten ta bin cu plataforma di crecemento economico Caribeño

Posted on 02/2/2026 9:24 am AST | Updated on 02/2/2026 9:29 am AST

DEN HAAG – Un Plataforma di Crecemento Economico Caribeño cu mester wordo establece ainda, lo tin como proposito pa stimula e desaroyo economico y innovacion di e seis islanan den e parti Caribeno di e Reino. Partidonan politico hulandes D66, VVD y CDA a inclui esaki den nan acuerdo di coalicion presenta diabierna cu e titulo “Aan de slag”. Ademas, lo pone 30 miyon euro disponibel di manera structural pa trata e problematica di pobreza den Caribe Hulandes y pa continua implementa e recomendacionnan di e Comision Social Minimo.

Reino ta ofrece hopi oportunidad pa fortifica sociedad y economia na tur dos banda di e oceano. “Pesei, nos ta pone enfoke riba cooperacion riba un base di igualdad, combate di pobreza y un uso hopi mas efectivo di oportunidadnan pa crecemento berde, segun e capitulo “Nos ta un solo Reino”, unda specialmente e aporte di D66 ta cla: Hopi mas contenido y considerablemente mas constructivo cu e poco palabranan den e programa di gobierno actual di gabinete demisionario PVV/VVD/NSC/BBB.

“Den cooperacion cu Aruba, Corsou y Sint Maarten, e enfoke ta riba bon gobernacion, proteccion di derecho humano y un estado di derecho fuerte. Nos ta yuda e paisnan pa aumenta nan autosuficiencia y ataca corrupcion. Den Caribe Hulandes, nos ta traha riba un minimo social di biba riba base di e consehonan di comision Thodé. Entre nan haci y mantene servicio esencial y nesesidadnan basico pagabel riba Saba, Sint Eustatius y Boneiro. Nos ta seigura cu e carganan pa empresarionan keda pagabel y cu nan keda tin espacio pa sigui emprende”, segun e coalicion nobo.

Posiblemente e anuncio mas llamativo ta cu lo wordo inclui den e statuut cu “e islanan por declara independencia si nan asina ke.”

E lazo di Reino cu Aruba, Corsou y Sint Maarten ta haci Hulanda bira hopi mas grandi cu simplemente un pais riba Laman Norte. Durante Copa Mundial di futbol 2026, Reino lo participa pa prome biaha cu dos team nacional. Reino ta ofrece hopi oportunidad pa fortifica sociedad y economia na tur dos banda di e oceano. Pesei, nos ta pone enfoke riba cooperacion riba base di igualdad, combate di pobreza y un uso hopi mas efectivo di oportunidadnan pa crecemento berde. Den e cooperacion cu Aruba, Corsou y Sint Maarten, e enfoke ta riba bon gobernacion, proteccion di derechonan humano y un estado di derecho fuerte. Nos ta yuda e paisnan pa aumenta nan autosuficiencia y ta ataca corrupcion. Esaki ta loke nan ke haci:

- Politica nobo cu ta wordo introduci den Hulanda Europeo lo wordo aplica na principio tambe den Caribe Hulandes, a menos cu tin motibonan serio pa no haci esaki.

- Den Caribe Hulandes, ta traha riba un minimo social biba, riba base di e consehonan di comision Thodé, incluyendo hasi y mantene servicionan publico y necesidadnan basico pagabel riba Saba, Sint Eustatius y Boneiro. Ta cuida cu e carganan pa empresarionan keda pagabel y cu nan keda tin espacio pa sigui cu nan actividadnan empresarial.

- Pa mehora e calidad di gobernacion y e maneho financiero, lo modernisa e leynan marco administrativo y financiero pa Boneiro, Sint Eustatius y Saba. Ademas, lo introduci e ley Bibob pa proteha integridad administrativo. Lo sigui, for di Hulanda, traha hunto cu Aruba, Corsou y Sint Maarten pa bon gobernanza, combate di socavacion y corrupcion, y pa fortifica de manera duradero economia y educacion riba base di acuerdonan duradero.

- E statuut ta forma e base pa e relacionnan entre e diferente paisnan. Den dje ta wordo inclui cu e islanan por declara independencia si nan asina ke.

- Hulanda tin un responsabilidad pa proteccion di e parti Caribeno di nos Reino. “Pesei nos ta mantene un presencia militar confiabel, pa asina por proteha nos interesnan mihor”.

- Ta haci e proceso mas facil pa habitantenan di e islanan pa por vota pa Parlamento Europeo.

- E parti Caribeño di e Reino ya ta sinti e consecuencia di cambio climatico, manera deterioracion di coral y inundacionnan. “Pesei nos ta continua cu e agenda climatica comun y ta pone den practica e Plan di Politica di Naturalesa y Medio Ambiente pa Caribe Hulandes”.

- Ta traha riba un futuro economico duradero pa e islanan. “Pesei nos lo establece un Plataforma di Crecemento Economico Caribeño, cu como proposito pa stimula e desaroyo economico y innovacion riba e seis islanan. E Institucion Nacional di Inversion por inverti den tur cuatro pais di e Reino, cu mesun condicionnan cu ta conta na tur lugar.

- Ta traha activamente riba concientisacion social tocante e pasado colonial y e pasado di esclavitud, y riba e impacto duradero cu esaki tin, den cooperacion cu e seis islanan Caribeno. NOTA: Colaboracion y cortesia di dossierkoninkrijksrelatie.nl

Hulanda ta pone placa disponibel pa seguridad alimentario pa nos islanan
DEN HAAG – Gobierno Hulandes kier establece un fundacion nobo cu mester fortalece seguridad alimentario riba seis isla Caribense di Reino. Ta trata di Stichting CariFoodFund (CFF), pa cual 18 miyon euro lo wordo pone disponibel como capital inicial. Esaki ta resulta di un carta di staatssecretaris Eddie van Marum di Asuntonan Interno y Relacionnan di Reino na Tweede Kamer. Establecemento lo wordo presenta via e asina yamado procedimiento di pre-avis riba base di Comptabiliteitswet 2016. Kamer tin 30 dia pa haci pregunta adicional prome cu fundacion wordo establece efectivamente. Cu e fondo aki, gobierno kier reduci dependencia di importacion di cuminda riba Aruba, Corsou, Sint Maarten, Boneiru, Sint Eustatius y Saba. E islanan ta hopi dependiente di cuminda importa. Segun gobierno, e dependencia ey a resulta extra vulnerabel desde pandemia di corona y tension geopolitico, specialmente pa producto frescu manera berdura, fruta, lacteo, pisca y carni.
Mas Hulanda
Lesa Mas
Candidato pa secretario di estado pa D66 ta retira pa motibo di CV incorrecto
DEN HAAG – Parlamentario di D66 Nathalie van Berkel, cu su partido a propone como staatssecretaris (secretario di estado) di Finanza, no lo drenta mas den e gabinete nobo. E la a decidi pa retira su candidature despues cu a sali na cla cu el a duna informacion incorrecto tocante e estudio cu el a sigui. E corant Volkskrant a reporta e caso awe mainta como prome. For di investigacion di e corant a resulta cu Van Berkel durante añanan tabatin un relato riba su CV cu no tabata corecto cu su pasado academico. Estudionan cu tabata menciona riba su CV na LinkedIn, el nunca a completa. Tambe el a studia riba un nivel mas abou cu el a indica. Den un declaracion, Van Berkel ta bisa cu “e discusion cu a surgi ta distrae di e tarea importante cu e gabinete tin dilanti di dje.” El ta enfatisa cu nunca no tabata su intencion pa presenta informacion incorrecto riba su CV.
Mas Hulanda
Lesa Mas
Premier hulandes saliente a dispidi den ultimo conseho di minister di gabinete Schoof
DEN HAAG - “Mi a cuminsa como un hende optimista i asina mes mi kier termina”, asina prome minister Dick Schoof a bisa ora el a mira bek riba su periodo di gabinete, despues di su ultimo reunion di conseho di ministro diabierna. Segun e, el a haci “tur loke tabata den nos posibilidad”. Den e ultimo reunion di conseho di ministro, a come bolo y Schoof a papia un ultimo palabra dilanti di e ministronan y staatssecretarionan. Nan, na nan turno, a gradici e prome minister. “Nan a elogia mi energia y e sonrisa”, asina Schoof a bisa. E prome minister saliente a menciona, entre otro cosnan, e leynan di asilo y e formalisahe di e norma di NAVO como “paso importante” di su gabinete. Cu no a logra cumpli un di e promesanan mas importante – resolve e problema di stikstof – ta, segun Schoof, pasobra e cuestion ta “mucho mas compleho cu hopi hende ta pensa”.
Mas Hulanda
Lesa Mas
Na Hulanda, compania di cerbez Heineken ta anuncia retiro masal
AMSTERDAM - Heineken lo kita den e dos añanan benidero ainda 5000 te 6000 puesto di trabou. E compania di cerbez a anuncia esaki awe mainta durante presentacion di e cifra anual di 2025. Heineken ta indica cu e kier aumenta productividad door di elimina cierto funcionnan. Actualmente, mas cu 87.000 hende ta traha na Heineken. Anteriormente ya tabata anuncia un reorganisacion grandi na oficina central na Amsterdam. E ronda di retiro di 400 puesto ta parti di e reorganisacion amplio cu Heineken a anuncia awe.
Mas Hulanda
Lesa Mas
Gabinete nobo hulandes ta huramenta oficialmente riba 23 februari riba bordes di Rey
DEN HAAG - E gabinete nobo di D66, VVD y CDA lo huramenta riba 23 februari, manera cu tabata caba anota “den potlood” den agenda di e negociadornan. Servicio di Informacion di Reino (RVD) a confirma e fecha oficialmente. Den mainta, e ministronan y secretario di estado lo wordo huramenta y despues e ministronan nobo lo saca un portret hunto cu rey Willem-Alexander riba e bordes di paleis Huis ten Bosch. Den merdia lo tin e prome reunion di conseho di ministro, y na principio di anochi e miembronan di gabinete lo haci conocimiento cu prensa parlamentario na Catshuis.
Mas Hulanda
Lesa Mas
Douane como protesta, lo controla tur maleta di pasaheronan cu yega Hulanda awe
SCHIPHOL - Douane na Schiphol lo controla diamars tur maleta di pasaheronan cu ta yega. Cu e accion aki, douaneronan kier pone atencion riba demanda pa salario mas halto, segun un vocero di sindicato FNV a confirma. Segun e informacion, pasaheronan por tuma na cuenta cu lo tin rijnnan mas largo durante e controlnan, pasobra tur maleta lo wordo revisa. Pues pasaheronan di Aruba cu biaha awe, mester tene cuenta cu esaki aunke no ta sigur cu e accion aki lo continua diaranson pa ora cu pasaheronan di Aruba yega.
Mas Hulanda
Lesa Mas