Zr. Ms. Friesland ta tuma rol di patruya den region Caribe

ORANJESTAD – E barco di marina Hulandes Zr. Ms. Friesland lo tuma, for di inicio di februari, e rol di barco permanente di vigilancia den region Caribe. E barco di patruya a yega  Sint Maarten dialuna mainta pa un bishita corto y awe e ta sigui bay pa Willemstad, unda e lo drenta e bahia di Sint Annabaai. Durante e periodo cu ta bini, Zr. Ms. Friesland lo ta activo cu patruya den region Caribe y tambe lo ta cla pa duna asistensia na caso di emergencia. Cu esaki e barco ta reemplasa Zr. Ms. Groningen, cu durante e ultimo lunanan a haci patruyanan frecuente rond di e islanan ABC. E barco anterior a funciona como e “wowo y orea” di e Ministerio di Defensa riba laman y a sostene, entre otro, e Guardia di Costa Caribeña cu tarea di seguridad maritimo y ayudo den situacionnan di emergencia.

Mescos cu su antecesor, Zr. Ms. Friesland ta wordo sosteni door di un helicopter maritimo tipo NH90, cu ta wordo manda for di Hulanda pa e region Caribe. Cu ayudo di e helicopter aki, e barco por supervisa un area mas grandi y reacciona mas rapido ora cu tin incidente riba laman.

FLEXIBLE

Marina Real di Hulanda tin cuatro barco di patruya di e clase Holland. E tiponan di barco aki ta conoci como barco di patruya pa biahe largo riba laman, y nan ta hopi flexible den uso. Nan ta diseña specialmente pa supervision, control y tarea di seguridad tanto den area di costa como riba laman habri.

Door di tin permanentemente un barco di vigilancia den region, e Ministerio di Defensa ta indica cu e ta duna un contribucion duradero na mantene paz, seguridad y stabilidad den region Caribe.