A sentencia homber na Hulanda, cu a menasa prome minister Pisas di Corsou riba Facebook

A’DAM/W’STAD.- Un hòmber yu’i Kòrsou, bibá na Hulanda ayera den korte dilanti di un “politierechter” na Almere a keda kondená pa menasa via di facebook kontra di promé minister Gilmar Pisas. E hòmber a haña kastigu di 40 ora di trabou, kaminda e ta traha grátis riba kualke proyekto pa komunidat, ta loke ku wes a dikta.

Ta trata dje akusado di inisial M.T., kende dia 29 di òktober 2025, a keda detené pa e menasa ku el a pone riba Facebook kontra di Pisas. E loke ku e akusado a pone ta relashoná ku e retiro di Javier Silvania komo minister di finansa. El a skirbi riba Facebook:”Si algu pasa Silvania, Kòrsou mester lanta i mata Pisas”.

M.T. tabata basta emoshoná ayera dilanti di wes, hasiendo moveshonnan ku su man i stèm haltu, el a bisa ku no tabata su intenshon pa menasá Pisas, i a nenga tambe ku e tabatin tal intenshon di menasá promé minister Pisas. El a bisa wes ku e kaso tabatin impakto grandi riba dje paso su potrèt a sali den dos korant grandi na Kòrsou. Dor di esei el a keda molestiá.

Segun e akusado a bisa wes ku a interpretá su palabranan otro. “Ta mi manera di papia asina ku mi amigunan. Papiamentu no por keda tradusí literalmente den Hulandes, i awor e ta keda interpretá di otro forma”, el a bisa. Tambe el a deklará ku no tabata su intenshon di kier a mata Pisas.

Sinembargo wes a mustra e akusado bon kla ku riba Facebook bo no ta kondusí un kombersashon privá. “Bo no ta sintá den un bar ta papia. Tur hende por mira loke a keda skirbi, i por a komprondé di otro forma tambe”, wes a bisa.

Fiskal di su parti a bisa ku un menasa no direktamente mester ta dirigí kontra di un promé minister p’e ta kastigabel. Ademas mester a komprondé e situashon den kual M.T. a skirbi e teksto, pasombra tabata un momentu ku tabatin un “tenshon” polítiko riba e isla.

Despues di defensa, wes a tuma un desishon mesora, indikando ku e teksto di loke e akusado a skirbi ta un menasa.”Nos komo komunidat tin hopi molèster di menasa via “online”. Wes a sigui bisa e akusado ku e mester a realisá ku e tipo di palabranan aki no por keda tuma asina simpel. Pa loke ta e kondena wes a tene kuenta ku konsekuensia ku tabatin p’e akusado debí na atenshon di e kaso den media. Tambe wes ta kere ku enberdat e no tabatin plan pa mata Pisas. P’esei wes ta yega na un kastigu di 40 ora di trabou pa M.T. E hòmber M.T. tabatin un otro kastigu kondishonal pa otro echo, pero wes no a pidi OM pa ehekutá esaki. Finalmente wes a bisa e akusado pa di awor en adelante e ta mas kuidadoso riba Facebook. NOTA: E texto ta scirbi den papiamento fonetico di Corsou.