Analisis: Ora un intervencion policial caba fatal – kico mester wordo examina?

Scirbi pa Tito Laclé

Cu e caso di tragico ayera unda un homber a bin perde su bida despues di un confrontacion cu un agente policial, e discussion publico di uso di poder policial a cuminsa atrobe. Den cuestion di un aña, esaki ta bira otro caso cu ta hala atencion di comunidad y cun’e, e discussion di kico a pasa, mester a pasa y/of no pasa. Y   aki tambe tin e version ‘oficial’ di polis y e version di famia of familiarnan cu ta duna un otro bista y/of angulo di e caso. Mientras cu e echonan ‘oficial’ tey, esta cu un homber a resulta morto ora cu polis a actua y tira riba dje, e investigacion ta continua pa saca afo kico exactamente a sosode y kico a conduci na e resultado fatal, y si e uso di arma reglamentario policial tabata hustifica. A cuminsa tambe, e debate publico. Y ta aki ta unda nos ta drenta. 

Por a nota rapidamente riba rednan social, un ola di reaccion, y depende na cua banda bo ta para of cu abo a lesa y ta na altura di dje, bo ta haya un reaccion diferente. Pa cuminsa, e relato di polis. Polis ta papia di cu tabatin un homber agresivo, cu tabatin un ‘machete’ den su man. Version di cierto famia (noticiacla no por a verifica si e relato ta realmente di un famia of di conocirnan cerca di e famia), ta bisa cu ta trata di un homber spanta cu no ta un machete, sino un cuchiu di cushina, y cu e homber tabata mas bien alerta, spanta pa polis y no cu mal intencion. Loke ta confirma pa polis, of mas bien segun relato policial, ta cu e agente policial en cuesto a sinti su mes menasa, y a ‘los tiro, alcansando e pashent’. Version di ‘famia’ ta mas specifico, unda cu ta papia di cu e agente policial a los 3 tiro, den pecho di e victima. E ta zona poco similar cu e caso di e hoben Lannoy cu lo a wordo ‘sefta’ cu bala ora cu e no kier a scucha di polis aña pasa. E tempo ey tambe a cuestiona e polisnan pa abuso di poder y uso abusivo di e arma reglamentario. Consecuencia di e investigacion haci oficialmente, ta cu e polisnan envolvi den e caso ey (caso Lannoy) , ta sospechoso di husticia, y awor ta spera nan den corte e aña aki pa defende nan curpa. E pregunta cu hopi ta haci awor, ta si esaki por bira un caso similar. Esta cu e polis cu a tira, a actua corecto, of no. Si e polis a los mas cu un tiro berdad y pakico a opta pa tira dirigi riba pecho, y no otro parti di curpa di e victima. Investigacion andando,  tin cu demonstra kico realmente a sosode. 

E presencia di rednan social no ta yuda sigur aworaki, unda cu di un banda, mas informacion ta sali cu ‘por’ yuda e investigacion, of por juist ‘daña’ e investigacion. E por crea un agitacion tambe den publico, crea rabia, y cu ne, e efecto cu esaki por tin pa cuerpo policial atrobe. E libertad cu tin pa hende  ventila nan opinion, tey, pero no tur ora ta yuda. E ta comprendibel cu kier ventila, pero den e caso aki, e por pone mas gasoline riba e 'candela'. Esaki ta conta tanto pa e famia como pa cuerpo policial. E realidad ta tambe cu tin dos banda di medaya den algo asina. E victima, y esun cu a tira, den e caso aki, e agente policial. E victima, ta conoci den comunidad, of su barrio y no tabata un ‘criminal’ cu tabata huy. E tabata un persona cu retonan mental y un pashent bou di tratamento. Su actonan, pa violento cu e por a mustra of tabata, tabatin su origen, y historia medico. E morto ta laga un famia atras cu awor tin cu bay maneha e dolor inmenso aki. Y tin e parti policial. Ta conoci cu polisnan tin cu entrega nan arma ora cu algo asina sosode, y e tin cu pasa e proceso pa determina si su arma reglamentario tabata usa apropiadamente. E acto aki tambe ta impacta e polis. E tambe ta ser humano y tin sentimiento. Esaki kier men cu e tambe ta afecta emocionalmente y mester di ayudo pa yuda maneha e impacto. Su acto,a pone cu awe tin un otro persona morto. Berdad cu polis ta entrena pa casonan unda cu mester usa e arma como defensa, y undam ester por usa e arma ora cu ta necesario. Pero esaki no necesariamente kier men cu e ta algo facil. Polis no ta robot, pues ni maske cuanto bo entrena, un tiramento cu resultado fatal, sigur den e caso aki, tin un impacto grandi riba e polis. 

Tambe ta keda atras, hopi pregunta cu mester haya contesta. Tin cu lo nunca haya contesta, y tin cu investigacion por trece claridad riba otro dudanan. 

PREGUNTANANEntre e preguntanan, tin esaki. E version cu e victima, e pashent, persona lo a bandona e centro Respaldo, sin permiso. Pero aki tambe tin versionan contradictorio. Ken a permiti e victima di bandona e centro. E famia a haci malo di bay cas cu e victima? Kico ta e razon cu e FACT team a bai asina leu di jama polis? E pashent a bira agresivo? Por a jega na un acuerdo cu e mama pa hiba e pashent bek dentro e tempo stipula? Polis a wordo notifica di un pashent psychiatrico agressivo? Ora polis a jega nan a hanja informacion corecto di parti di e FACT team promer cu nan a bai den e cas? Ta bin e ora e "aanwenden van geweld" di parti di e polis: Berdad tawata tin peliger de inmediato pa su bida y bida di otro cu e mester a bai over na usa su arma reglamentario? Tawata tin espacio pa tuma otro medida manera tiro di advertencia of tiro dirigi pa neutralisa e agresor por ehempel den pia? Berdad cu ta papia di waarschuwingsschot pero tawata tin espacio of oportunidad pa esaki? Tiro di advertencia den un cas no ta consehabel paso por sosode cu e bala lo rigoshet y dal otro hende innocente. Si tiro directo tawata necesario di berdad e lo mester tawata 3 tiro den pecho? Of por a tira den pia? Normalmente ta decision di momentum pero di otro banda ta trata di un asistencia pa un pashent y no pa un criminal cu di berdad mester a jega dje leu ey. Hopi pregunta cu mester haya contesta. Mientrastanto, comentarionan ta sigui. Y un cos ta bolbe bin na discussion. Ta tempo pa cuminsa usa e asina yama ‘taser gun? Un arma cu ta ‘knock out’ e ‘persona afecta temporalmente’, envez di tira cu arma cu por ‘mata’ e persona. Pa aworaki, laga nos tur keda trankil, y laga husticia haci su trabou. Forza na famia di e victima, y tambe na famia di e polis envolvi. Cu sano huicio prevalece den e caso aki tambe.