Ta spera cu entre awe cu mayan, formacion di gobierno hulandes ta cla

DEN HAAG - Lo ta “hopi bunita” si awe ta logra yega na un acuerdo riba e finansas. Asina lider di partido politico hulandes D66, Rob Jetten, a bisa na su yegada awe mainta na reunion pa formacion di e proximo gabinete. “Nos tin ainda algun dia, pero nos ta yega hopi leu kaba.” Lider di CDA, Henry Bontenbal, a indica cu nan mester logra un acuerdo “awe of mañana”. Lider di VVD, Dilan Yesilgoz, a bisa solamente “ban wak” y “e ta dura mientras e mester dura”.

E tresnan a negocia tur fin di siman riba e “plachi financiero”, manera unda placa ta bay for y unda placa ta drenta. Awe nan lo sigui cu e negocacion. E intencion ta cu diabierna tin un acuerdo di coalicion cla, unda tur e politica proponi ta wordo inclui. E finansas mester ta regla prome, pasobra nan mester wordo recalcula. Tambe e fraccionnan di e tres partido mester duna nan aprobacion riba e plannan.