Varios buelo di Merca pa Aruba cancela pa diadomingo y dialuna

ORANJESTAD – Manera cu Noticiacla a alerta for di diabierna, e fin di siman aki, e mal tempo di invierno na Merca por a afecta Aruba tambe. Y ta mustra cu esaki lo cuminsa for di diadomingo, drentando dialuna. Segun e informacion cu Noticiacla tin for di e registro di buelo di aeropuerto di Aruba, por lo menos 5 buelo ta cancela caba pa diadomingo for di Merca, cu 5 mas pendiente di por cancela. Pa dialuna tambe tin 4 buelo cancela caba, cu 5 otro buelo potencialmente poni pa cancela. Tur e buelonan aki ta origina sea for di New York, Boston of Newark, esta e parto Noord oost di Merca. Y esaki ta e efecto directo di e tormenta di sneeuw pisa cu a cuminsa asota Merca for di diabierna. 

NOTIFICACION

Aeropuerto mes a notifica diasabra anochi cu ta mustra cu Aruba lo por keda afecta, pero no a indica cuando buelo lo ta cancela. A informa cu debi na e tormena Fern, varios buelo pa y for di Aruba a wordo cancela y of por experencia retraso. A pidi tur pasahero pa check nan status di buelo, prome cu nan yega aeropuerto. NOTA: E potret ta un dramatisacion di e situacion describi den e articulo, y no ta un potret real.