Gobierno a draai bek decision pa duna sector priva tambe liber dia 26 di januari proximo

ORANJESTAD – Despues cu gobierno inicialmente a duna liber completo dialuna awor dia 26 di januari 2026, a bira esaki bek algun ora despues, y bisa awor cu esaki ta solamente pa trahadornan publico. Esaki a sosode despues cu gobierno a haya reaccion fuerte di banda di comercio, cu no a aprecia e ‘gesto’ di ‘ultimo ora’.  Esey a pone cu gobierno a cambia su decision. Minister encarga cu labor, Wendrick Cicilia a purba clarifica e asunto despues.

DIA DI FIESTA

Segun e minister, diadomingo awo ta Dia di Betico y como tal un dia di fiesta. E dia ey, di acuerdo cu nos ley laboral, empleadonan publico y priva ta sea liber of lo haya un compensacion adicional pa traha riba un dia di fiesta. “Pero como cu e aña aki nos ta celebra 40 aña di nos Status Aparte y 50 aña di nos Himno y Bandera, nos kier pa pueblo celebr’e den grandi”, asina mr. Wendrick Cicilia, Minister Labor a anuncia despues di a ratifica su decision pa cu e dia liber den Conseho di Minister. 

 CELEBRACION NACIONAL

Pa por garantisa cu diadomingo ta bira un dia di celebracion nacional cu participacion di mas hende posibel, a opta pa duna empleadonan publico liber dialuna tambe. Asina mayornan por pasa tempo cu e muchanan cu tambe ta liber na scol. 

APELACION RIBA GOBIERNO

Como cu gobierno no por sin mas impone un dia liber pa sector priva, ta haci un apelacion riba comercio pa, te unda por, habri espacio pa nan empleadonan tambe por tin un dia di descanso despues di a celebra e dia nacional riba diadomingo. Segun e mandatario, e la haci lo posibel pa otorga e dia liber na sector priva, sinembargo den cuadro di ley, esaki no tabata un posibilidad. 

Mester aclaria cu e dia liber y di fiesta ta keda diadomingo. E dia siguiente ta un dia extra di descanso cu gobierno ta ofrece na su empleadonan. Pues si un empleado traha riba dialuna, e lo no cobra dobel, solamente si mester traha riba diadomingo dia 25 di januari 2026. 

“ E berdad ta cu den varios sector, e decision pa cambia e dia liber di diadomingo pa dialuna, den un lapso di tempo asina cortico, lo a causa retonan inespera. P’esey ta subraya cu e dia liber dialuna ta pa gobierno y pa sector priva un apelacion” e mandatario a sigui bisa. 

“Mi ta di acuerdo si cu nos mester cambia e ley aki bek, manera e tabata den pasado, unda e minister por cambia e dia di celebracion pa un dia despues, si e fecha ta cay den weekend. Parlamento algun aña pasa a cambia e ley, marando man di e mandatario y limitando e opcionnan. Mi lo traha riba e cambio aki y pronto mand’e pa busca sosten den Parlamento di Aruba”, manera ta deseo di Minister Wendrick Cicilia.