Analisis: ‘Pico y placa’ como solucion pa trafico na Aruba?

Scirbi pa Tito Laclé

Como parti di e reaccion di e varios analisisnan traha siman pasa riba e situacion di trafico na Aruba, a surgi e punto di ‘introduci’ e concepto internacional di ‘Pico y Placa’. E sistema ta limita circulacion di auto segun e ultimo number di e placa (nummerplaat), aplicando e regla riba cierto dianan y cierto oranan. 

PAKICO PICO Y PLACA?

Aruba ta enfrenta un presion serio riba su red di caminda. Riba un isla di mas o menos 6 miya hancho  y 20 miya  largo, tin alrededor di mas di 80 mil auto registra. Practicamente cada cas ta depende di por lo menos un auto pa mobilidad diario.  Mensualmente, mas o menos 60% di e poblacion laboral ta gana salario minimo. E combinacion aki ta crea un realidad dificil: hopi auto, poco espacio y limitacion financiero pa cambia facil pa otro medio di transporte. Den e contexto aki, a surgi e pregunta si Aruba por considera introduci e sistema conoci como “pico y placa”, un modelo di restriccion di trafico cu ta wordo uza den paisnan manera Colombia y den diferente parti di Europa.  

CONTEXO LOCAL Y APLICABILIDAD

Na Aruba, problema di trafico ta concentra principalmente durante ora di pico: mainta ora hende bai trabou y scol, y atardi ora nan ta bolbe cas. Zona manera Oranjestad y e entrada principal di distritonan residencial ta experiencia congestion casi diario. Teoricamente, “pico y placa” por keda aplica solamente durante e oranan critico, y no riba dia completo. Tambe por ta limita na zonanan mas carga. Un introduccion gradual, manera un prueba piloto, por duna gobierno y comunidad un oportunidad pa evalua impacto real promé cu decidi riba un aplicacion permanente.

ARGUMENTONAN NA FAVOR

Entre argumentonan na fabor, tin reduccion di congestion, menos auto riba caminda durante ora di pico por mehora fluho di trafico y baha tempo di biahe. Como beneficio ambiental, ta papia cu menos circulacion di auto ta nifica menos contaminacion di aire, loke ta positivo pa salud publico y imagen di turismo. Enbes di inverti constantemente den ampliacion di caminda, cu espacio limita, e isla por maneha e capacidad cu tin caba, miho. Un medida asina por  stimula carpooling, planificacion di trayecto y, den algun caso, uso mas frecuente di transporte colectivo.

PUNTU CRITICO Y RIESGO SOCIAL

Claro cu tur plan tin su parti negativo tambe. Den e caso aki no ta un excepcion. Entre e puntonan critico tin cu introduccion di ‘Pico y Placa’, por tin carga riba hende cu ingreso abou. Pa hopi hende cu ta gana salario minimo, e auto no ta un luho sino un necesidad. Restriccion sin alternativa real por afecta acceso na trabou y stabilidad economico. Experiencia internacional ta mustra cu algun famia ta cumpra un segundo auto, hopi biaha mas bieu y mas contaminante, pa evita e regla. Esaki por reduci e efecto positivo di e medida. Tambe mester pensa cu sin un sistema di bus confiable, frecuente y sigur, “pico y placa” ta dificil di sostene y por genera frustracion social. Y no lubida riba comunicacion. Sin comunicacion cla y participacion di comunidad, e medida por wordo percibi como imposicion y no como solucion colectivo.

CONDICIONAN CU MESTER. 

Pa cu un sistema di “pico y placa” tin posibilidad di exito na Aruba, diferente condicion mester wordo cumpli. Entre nan, fortalecimiento di transporte publico, cu mas frecuencia y puntualidad, excepcion claro pa servicionan esencial y persona cu necesidad especial y evaluacion continuo di impacto social y economico. Por haci esaki en combinacion cu otro medida, manera orario flexible di trabou y estimulacion di comparti auto.

CONCLUSION

“Pico y placa” no ta un solucion magico pa problema di trafico na Aruba. E por ta un instrumento adicional, pero solamente si introduci esaki cu prudencia, sensibilidad social y bon preparacion logistico. Sin alternativa di transporte y sin proteccion pa e grupo cu ingreso abou, e riesgo ta grandi cu e carga principal lo keda riba e mesun sector cu tin menos margen pa adapta.

Riba un isla chikito cu dependencia grandi di auto, solucion di trafico mester ta equilibra: eficiente pa caminda, pero husto pa hende.