Sindicato di machinistanan na Spaña ta yama pa huelga nacional despues di accidente di trein

CATALONIA - E sindicato di machinistanan na Spaña ta yama pa un huelga ferroviario nacional despues di e serie di accidente di trein di e ultimo dianan. E sindicato Semaf ta exigi cu e responsable di seguridad riba e red ferroviario wordo persigui penalmente.

Segun Semaf, e accidente di ayera na Catalonia a wordo causa door di objetonan cu un tormenta a hiba riba e rails, pero e sindicato ta señala tambe claramente riba e mal estado di e infrastructura. “Nos tur na Semaf ta profundamente entristeci y nos ta considera e deterioracion continuo di e red ferroviario inaceptable. Ta urgente cu diferente medida wordo tuma riba henter e red pa garanti seguridad di profesionalnan y pasaheronan.”

Durante e accidente di trein tambe tres machinista a perde nan bida, segun cu Semaf ta raporta. “Anochinan nos a ricibi e noticia tragico di morto di un otro colega. Ademas, varios otro colega y biaheronan a resulta heri, algun gravemente.”

Tres accidente di trein den tres dia

Diadomingo anochi, un trein di halto velocidad a sali di rails cerca di Adamuz, den region sur Andalusia. E trein a drenta riba un rail bisiña y a wordo golpea door di un otro trein cu tabata bin di direccion opuesto. E cantidad di morto a subi mientrastanto te 42, y decenan di hende ta den hospital. Tambe tin persona cu ta wordo considera desapareci. Ta posible cu ainda tin hende atrapado entre e restonan di e trein.