Tromp: Hopi hende den komunidat tin mi pa un “grote boef”

WILLEMSTAD.- E èks Presidente di Banko Sentral, dr. Emsley Tromp, ta lamentá ku hopi hende den komunidat tin e komo un ladron grandi, un “grote boef” manera e mes a deklará, un korupto, siendo ku pa hopi tempu el a sakrifiká i duna tur loke e tabata por na bienestar di pais. Aktualmente bida ta difísil pe ya ku aparte di e karga sikológiko, físikamente e no ta konosiendo su mihó tempu. Tromp ta ser akusá ku den e temporada di mei 2009 pa yanüari 2017 el a hasi su mes kulpabel di falsifikashon di dokumento. El a bai den apelashon ku su kaso despues ku korte di promé instansia a sentensi’é na 6 luna kompletamente kondishonal.

Den e kaso aki un bon kolega di dje na Banko Sentral (Lourens) a habri un kuenta bankario i hasi un fiansa di no ménos ku $400.000 riba su nòmber pa supuestamente a start ku un negoshi di paña pa su (èks) amiga Janet de Castro. Lourens a habri e kuenta komo ku Janet mes komo Kubano no por a hasi esei. Pero hustisia a kai den e asuntu aki na momentu ku a nota ku e plaka dje fiansa no a bai pa e negoshi (Curaçao Fashion Group) sino ku el a ser transferí pa un kuenta personal di Tromp.

Ora ku hues a repasá su sirkunstansianan personal, sr. Tromp a duna di konosé ku henter e asuntu aki tin dies aña kaba den korte i ku el a laga su bida na wèrki. Na Merka (Miami) unda e ta biba, niun hende sa ken e ta, e ta oké i ta djis un number meskos ku otronan, pero aki na Kòrsou tin hopi ku ta mir’é komo un ladron grandi. Den un komunidat chikí manera esun di nos bo reputashon ta hopi importante, p’esei el a trata di hasi tur kos korekto den su funshon komo presidente di Banko Sentral. El a traha di akuerdo ku su konsenshi, duna tur sorto di konseho pa bienestar di e sektor finansiero i di pais.

Pero awe despues di dies aña den e odisea aki, e no tin bida. Pa motibu di su malesa e no ta sosialisá. Su yunan tambe ta sufri bou dje situashon. Es mas, ora ku e kier a duna su kontribushon den e periodo di Covid-19, tin no ménos ku tres sekretario di estado ku a sera su stròt i tené afó. Finalmente el a pidi Hof pa na momentu di su un desishon, no a hasi esei a base di duele i kompashon pa su situashon, sino hasi esei a base di echonan den e kaso. NOTA: Texto ta scirbi den papiamento fonetico di Corsou.