Petro ta anuncia reunion cu Trump na Merca dia 3 di februari

BOGOTA - Presidente di Colombia, Gustavo Petro, a bisa cu e  lo reuni cu su homologo Mericano, Donald Trump, na Merca dia 3 di februari, mientras cu tension diplomatico entre nan ta bahando. Trump y Petro tabata tene confrontacion verbal duro aña pasa, y tension a subi despues di atake Mericano riba Venezuela dia 3 di januari, cu Trump mes a manda  menaza di posibel accion militar den Colombia. Simana pasa, ambos a baha tono despues di un yamada telefonico, den cua nan a acorda pa maneha e situacion sin conflicto. Petro a bisa diahuebs cu su bishita “lo ta dia 3 di februari”, durante un encuentro televisa cu su ministronan. “Nos lo mira kico e reunion ta trece”, segun e mandatario di linea izquierdista. Den nan prome conversacion bilateral, nan a compromete pa traha hunto contra narcotrafico den Colombia, particularmente contra ELN, un grupo guerrillero cu ta opera na frontera cu Venezuela.