Raket di NASA cla pa su prome buelo cu tripulacion pa luna desde 1972

MIAMI - Pa prome cu diabierna, un  raket grandi por sali for di su edificio di ensamblage na Florida. E aparato mester trese hende bek pa luna pa prome biaha den mas cu 53 aña. E astronautanan di mision Artemis II no lo aterisa ainda riba luna; esaki ta e meta di e siguiente mision.

NASA a bisa cu lansamento di Artemis II no lo tuma luga prome cu anochi di 6 pa 7 februari, pero por wordo atrasa mas.

E raket, cu ta98 meter halto, lo hiba un capsula Orion di NASA cu cuatro astronauta — tres mericano y un canadiense — den un orbita rond di tera. For di ey, e capsula lo dirigi su caminda pa luna, un biahe cu ta dura mas o menos cuatro dia. Despues di pasa patras di luna, astronautanan lo bolbe bek, y lo drenta atmosfera den e capsula Orion cu casi 40.000 kilometer pa ora. Tur mision ta dura dies dia y ta un ensayo pa Artemis III, cu segun un plan optimista lo pone dos mericano riba suela lunar den 2027.

Segun NASA e fecha probablemente lo dura mas largo, pasobra e cohete planea — un version di Starship di SpaceX — ainda no ta cla; y otro raket alternativo tambe ta den desaroyo.