CEO nobo di aeropuerto a yega Aruba y reuni cu minister

ORANJESTAD   –  Despues di un retraso chikito debi na problema di buelo (relaciona cu mal tempo na Europa), e CEO nobo di Aeropuerto, Johnny Andersen a yega Aruba porfin y a cuminsa traha. Minister di Turismo  mr. Wendrick Cicilia responsabel pa aeropuerto, a tene un reunion oficial cune, como parti di e proceso di introduccion y alineacion strategico despues di su reciente nombracion. Minister Cicilia tabata compaña pa Tico Croes y Philippe La Reine, y miembronan di Hunta di Comisario di Aruba Airport Authority encabesa pa Marion Kan, hunto nan a forma parti di e reunion. Durante e reunion a trata topiconan clave relaciona cu maneho di aeropuerto, desaroyo di aeropuerto den futuro, conectividad aereo y importancia di aeropuerto como un pilar fundamental di turismo y economia di Aruba.

Durante e encuentro e CEO nobo, Johnny Andersen, a expresa su compromiso fuerte cu Aruba y cu fortificacion continuo di Aeropuerto Internacional Reina Beatrix. Andersen a enfatisa su intencion pa traha estrechamente cu Gobierno, e Hunta di Comisario, y tur partner strategico pa garantisa e operacionnan eficiente y sostenibel alinia cu e necesidadnan presente y futuro di e pais.

Minister Wendrick Cicilia a subraya e importancia di un cooperacion estrecho entre Gobierno y gerencia di aeropuerto, specialmente den e momento crucial aki pa crecemento y modernisacion di infrastructura di aeropuerto.

“Aeropuerto Internacional Reina Beatrix ta un di e portanan principal pa nos pais y un motor esencial di turismo, empleo y desaroyo economico. Nos tin confiansa cu, bou liderazgo di Andersen, y pa medio di colaboracion fuerte y transparente, nos lo sigui fortalece nos aeropuerto na bienestar di Aruba y su comunidad”, tabata expresion di Minister Wendrick Cicilia.

E reunion ta reafirma e compromiso comparti di tur partido pa traha hunto pa sigui posiciona Aruba como un destinacion accesibel, competitivo, y cla pa futuro.