Chauffeur cu a causa hit & run diahuebs anochi, a entrega su mes

SAN NICOLAS – E chauffeur hende homber den e caso di hit and run di ayera nochi riba e caminda di Bernardstraat a presenta awe mainta na warda di polis San Nicolas. Asina vocero di polis Liliana Rasmijn a confirma diabierna mainta. “ Departamento di Trafico ta bezig cu e investigacion”. Segun Rasmijn, pa loke ta e victima, esaki ainda su situacion ta critico.

E CASO

Tabata diahuebs anochi cu Cuerpo Policial a haci un yamada urgentee na  chauffeur cu a hit & run den Bernardstraat: Entrega bo mes! Esaki ta otro caso den menos di un siman, unda cu un automobilista ta atropeya un peaton y ta sigui core bay envez di para na e sitio. Tabata diahuebs pa 9:20 di anochi cu Central di Polis a wordo notifica cu dilanti Warda di Polis San Nicolas un auto a dal un peaton crusando caminda.

Polis a mobilisa mesora y a bay wak e situacion y ta bin topa cu un hende homber riba caminda y cu no tabata reacciona. 

A pidi pa ambulance cu maximo urgencia na e sitio di sucedido. Na yegada di ambulance e personal a duna e victima assistencia medico y a stabilis’e. A transport’e cu maximo urgencia pa Hospitaal na unda varios patruya a cera varios caminda principal pa asina e victima por yega liher y sigur pa haya su tratamento medico. Specialista di trafico y polis technico a presenta na e sitio pa haci na investigacion. 

E VICTIMA 

E situacion di e victima tabata hopi critico diahuebs anochi, y polis a pidi pa oracion y sanacion pa e victima. Na final atrobe, a suplica na e chauffeur di e auto cu a dal e peaton, presenta na Warda di Polis y para responsabel pa su acto. “No por laga un hende benta abou pa su cuenta. E ta un ser humano y awor luchando pa su bida!” .Cuerpo Policial ta haci un apelacion pa esun cu por a wak algo of sa algo yama e tiplijn di polis cu ta 11141. Bo ta keda anonimo.