Diahuebs hues comisario ta dicidi si ta prolonga detencion di e chauffeur cu a causa morto di dos peaton

ORANJESTAD – E dama chauffeur cu a causa e accidente fatal lagando dos peaton morto, C. Fernandes (24), ainda deteni, lo presenta dilanti huez comisario diahuebs awor. Aki e huez comisario lo dicidi si ta prolonga e detencion si of no. Vocero di Ministerio Publico Ann Angela a confirma diamars atardi, cu lo pidi pa prolonga e detencion di e dama aki. “Finalmente ta na huez comisario pa dicidi si ta prolonga su detencion of no” e la bisa noticiacla. 

ACUSACION

E acusacion cu tin contra e dama chauffeur, ta cu ‘door di su falta, un accidente a tuma lugar den trafico a consecuencia di cual dos persona a fayece”. E accidente fatal a tuma lugar algo prome cu mei anochi, esta diadomingo anochi laat, ora cu e chauffeur a alcansa dos peaton y benta nan riba caya cu resultado fatal. E problema ta tambe cu e chauffeur no a para ora cu e la causa e accidente, sino cu e la core bay di e sitio. Despues, polis a detene e chauffeur y detene pa su actonan.