Lider interino Venezolano ta baha tono di critica y ta cla pa ‘traha hunto cu Merca’

CARACAS - E lider interino di Venezuela, Delcy Rodriguez, a bisa cu e ta dispuesto coopera cu Merca riba futuro di Venezuela, un cambio significativo di tono compara cu e reaccionnan inmediato despues di un operacion militar cu a resulta den secuestro di lider Nicolas Maduro pa for di fuerza special Mericano. Asina prensa Mericano ta raporta. Di banda di autoridad venezolano sinembargo, ta sigura cu ‘nada no a cambia’, indicando cu semper e tono tabata asina. “Nos semper a papia di respet”. 

TELEGRAM

“Nos ta considera como prioridad pa move den direccion di un relacion balansia y respetuoso entre Merca y Venezuela,” Rodriguez a skirbi riba Telegram diarazon. “Nos ta extende un invitacion na gobierno di Merca pa traha hunto riba un agenda di cooperacion cu ta apunta na desaroyo comparti,” e a sigui bisa. Rodriguez, cu desde 2018 a sirbi como supleente di Maduro, a wordo nombra lider interino pa Corte Supremo di Venezuela dialuna, despues cu Maduro y su esposa, Cilia Flores, a wordo deteni den e operacion militar mas halto perfil y mas arriesga di Merca desde cu equipo SEAL di Marina Mericana a mata lider di al-Qaeda, Osama bin Laden, den un cas na Abbottabad, Pakistan, na 2011. Den un discurso televisa dialuna, Rodriguez a condena e accionnan di Merca como “un atrocidad cu ta viola derecho internacional”, y a insisti cu “e unico presidente di Venezuela ta Presidente Nicolas Maduro”. E declaracionnan televisa di Rodriguez a crea un ruptura cu Trump, cu a sugeri den e reaccion inmediato despues di captura di Maduro cu oficialnan Mericano tabata den comunicacion cu ne y cu e tabata dispuesto coopera. Despues cu Rodriguez a yama su administracion un grupo di “extremistanan” riba television, Trump a cambia su tono rapidamente, pasando di yama Rodriguez “gracioso” pa amenaza ne directamente.