Aruba Birdlife Conservation kier usa su calendar pa 2026 pa recauda fondo pa e proteccion di shoco

ORANJESTAD – Aruba Birdlife Conservation a saca su calendar nobo pa 2026. E ganashi di Aruba Birdlife Calendar 2026 lo wordo usa pa proteccion di e Shoco, e uil di cueba Arubiano. Esaki a wordo anuncia door Aruba Birdlife Conservation. E Shoco ta un tipo di pahra endemico cu ta existi solamente riba Aruba, y segun estimacion, awe ainda ta keda mas o menos dos cien par di cria.

Segun e organizacion, e calendar ta parti di un  strategia di proteccion mas amplio cu a wordo expandi mas durante e añanan pasa. Na december 2024, e terreno di Tierra del Sol Golf Course a wordo declara oficialmente como Santuario Nacional di Shoco. Durante 2025, a añadi mas medida na esaki, entre nan e colocacion di cuebanan artificial pa cria na varios lugar riba e isla.

E cuebanan artificial aki a wordo coloca, entre otro, na Joia Aruba by Iberostar, Marriott Aruba y na International School of Aruba. E meta di e medida nan aki ta aumenta e cantidad di lugarnan sigur pa cria y asina mehora e posibilidad di sobrevivencia di e Shoco.

EXPANCION

Aruba Birdlife Conservation ta spera di expande e medida nan di proteccion mas durante 2026, cu cuebanan artificial nobo na otro locacion adicional. Cu esaki, e organizacion kier limita e riesgo di mas deterioro den e populacion.

Ademas di e proyectonan di proteccion cu ta corriendo, Aruba ta prepara su mes pa e World Owl Conference, cu lo tuma lugar na september 2026 riba e isla. Durante e conferencia internacional aki, lo comparti conocimiento scientifico tocante e Shoco y otro tipo di uil.

E calendar ta wordo bende via diferente punto di benta riba e isla. Segun Aruba Birdlife Conservation, e benta tin como proposito di genera financiamiento structural pa conservacion di naturaleza, sin depende di subsidionan ocasional.