Na Corsou, minister ta sugeri pa prohibicion di importacion di clapchi cu ta zona duro

WILLEMSTAD – Na Corsou,  por lo menos un minister di e gabinete MFK kier prohibicion di clapchi na Corsou. Specificamente, clapchi cu ta haci hopi boroto, manera donderboos, skybom y otro tipo asina. Ta trata di minister Charles Cooper. E ta bisa mesora si, cu ta su opinion personal e ta duna, pero mes momento ta pidi pa comienso di un discusion publico ‘y den nos Parlamento y pafo di nos Parlamento’, pa ban prohibi importacion di vuurwerk nan cu ta zona duro”. 

SU PENSAMENTO

Segun e mandatario, riba su pagina personal di Facebook, dialuna e la pone su punto bista personal. “Pues no como MFK” E ta specifica. “Ami tabata stima Vuurwerk. Tur aña mi tabata cumpra alrededor di 3000 (florin:red) na vuurwerk. E aña aki ta mi di dos aña cu mi lo NO cumpra vuurwerk mas. E asunto di donderboos, Skybom, etc cu ta zona asina duro y ta hasi daño na oido di hende y di animal, a pone mi yega na e desicion aki aña pasa” e ta bisa. “ Mi ta spera cu lanta un discucion publico y den nos Parlamento y pafo di nos Parlamento pa ban prohibi importacion di vuurwerk nan cu ta zona duro. I mi sa cu algun hende lo ome mi, pero den bida bo mester para pa algo si. Y ami ta para pa esaki!” e ta sigui bisa. Na final e ta pone algun frase tambe interesante:”  No mas terror contra nos baby nan. No mas terror contra nos grandinan. No mas terror contra nos animal nan. Ban pa vuurwerk nan cu ta saca cosnan bunita sin haci bochincha cu ta perhudica sernan vulnerable”.

E DISCUSION LOCAL

Na Aruba e discusion ta sigui tambe unda cu manera cu Noticiacla a raporta caba, tin un division den comunidad riba e tema. Esaki den sentido cu 50% ta pro pa sigui cu e cos manera cu e ta, y 50% kier trece cambio. Sea ta para cos completo of ta adapta e proceso y formato di tira clapchi, manera haci e periodo pa tira clapchi, mas cortico, of laga esaki solamente pa companianan cu ta pone pa show so. Pues no pa benta priva. Na Aruba no tin comentario ainda di mandatario riba e tema aki.