Cargamento di petroleo den Venezuela a baha, ya cu mas barco ta bira bek

CARACAS (Reuters) – Cargamento di tankeronan den Venezuela a baha fuerte dialuna, cu mayoria di barco moviendo carga di petroleo solamente entre puerto domestico, despues di accion di Merca contra dos barco mas y mientras compania estatal di energia PDVSA ta lucha pa recupera despues di un cyberatake, segun datonan di seguimiento y fuente. E Guardia Costera di Merca e luna aki a confisca un supertanker bou di sancion cu tabata cargando petroleo venezolano y a trata di intercepta dos otro barco relaciona cu Venezuela durante e fin di siman, segun autoridadnan mericano. Un di nan ta un barco bashi bou di sancion di Merca, y e otro ta un tankero  yen, sin sancion, cu destino China. Washington no a duna informacion actualisa tocante e barconan. Sin embargo, e bloqueo anuncia pa presidente mericano Donald Trump di tur tankero di petroleo bou di sancion cu ta drenta y sali di Venezuela a laga doñonan di barco den alerta constante. Mas laat dialuna, Trump a bisa cu Washington tal vez lo keda cu e petroleo cu a confisca for di costa di Venezuela den e simannan reciente, of tal vez lo bende esaki, añadi cu Merca tambe lo keda cu e barconan confisca.

Ministro di Asuntonan Exterior di Panama, Javier Martinez-Acha, a bisa den un entrevista di television dialuna cu e supertanker Centuries, cu tabata hiba bandera di Panama ora a wordo intercepta diasabra, no a respeta regla maritimo di e pais y a cambia su nomber y desconecta su transponder mientras tabata hiba un carga di petroleo for di Venezuela. Un pais cu ta duna su bandera na un barco den su registro oficial por anula e registro di e barco si un investigacion determina cu e no a sigui regla maritimo. E campaña di presion di Trump contra presidente venezolano Nicolas Maduro a inclui un presencia militar aumenta den region y mas cu dos docena atake militar contra barconan cu Estados Unidos ta alega cu ta transporta droga den Oceano Pacifico y Laman Caribeño cerca di e pais suramericano. Por lo menos 100 hende a muri. Dialuna, Trump a wordo pregunta kiko tabata su objetivo final cu Maduro. “Si e ta haci duro, esei lo ta e ultimo biaha cu e por haci duro,” Trump a bisa.

PRIJS DI PETROLEO TA SUBI

E interceptacionnan di barco a duna e golpe mas fuerte na PDVSA desde cu Departamento di Tesoro di Estados Unidos a impone sancionnan den 2020 riba e antiguo companianan di comercio di petroleo di e empresa y dos unidad di Rosneft di Rusia, cu a forsa corte den produccion y exportacion. Futuronan di petroleo Brent a subi cu 2,4% te US$61,94 pa bari dialuna despues di merdia, mientras petroleo crudo WTI di Merca tambe a subi cu 2,4% te US$57,89, despues di e accionnan di Merca y mey mey di e guera di Rusia contra Ucrania, cu tur dos ta causa temor pa interrupcion di suministro. Te dialuna, PDVSA a entrega un carga di 1,9 miyon bari di crudo pisa na e barco sanciona Azure Voyager, cu bandera di Aruba, na puerto Jose, pero ningun otro supertanker cu destino Asia no tabata programa pa carga pronto, segun documentonan interno di e compania.

Cantidad di tanker yena cu no a sali ainda a crece den e dianan reciente, laga miyonan di bari di petroleo venezolano pega den barco, mientras clientenan ta exigi descuento mas profundo y cambio den contrato pa tuma biahe riesgo mas leu for di awa di e pais. Algun tanker cu ta aserca costa di Venezuela, sea pa carga petroleo pa exportacion of pa entrega NAFTA importa, tambe a bira bek of suspende navegacion recientemente te cu instruccion di duenionan wordo clarifica, segun datonan di seguimiento di LSEG mustra dialuna. PDVSA ta restaurando lentamente algun sistema online y ta recuri na registro escrito despues di e cyberatake di siman pasa. E compania no a logra restaura completamente su sistema administrativo centralisa, y hopi trahadornan no a ricibi nan salario na tempo, segun fuente. PDVSA y Ministerio di Petroleo di Venezuela no a contesta peticionnan pa reaccion. Ministro di Relacion Exterior di e pais, Yvan Gil, a bisa dialuna cu e confiscacionnan di Merca ta contra derecho internacional y ta constitui “acto di pirateria”.

Ministerio di Relacion Exterior di China a bisa dialuna cu e interceptacionnan reciente di Merca ta un violacion serio di derecho internacional. Principal socio di empresa mixta di PDVSA, Chevron, a exporta un carga di 500.000 barril di petroleo venezolano diasabra, cu destino costa di Golfo di Merca riba un di su tankernan bou di su autorizacion mericano, segun datonan di barco di LSEG. Ministro di Petroleo Delcy Rodriguez a bisa diasabra cu Venezuela no a interrumpi entrega na Chevron. Chevron a exporta shete carga di petroleo venezolano na Estados Unidos e luna aki, cada un cu entre 300.000 y 500.000 barril, segun datonan di seguimiento.

PERSEGUI PA MERCA

E supertanker bashí Bella 1, cu Guardia Costera di Merca a trata di intercepta diasabra ora e barco a aserca Venezuela, tabata deriva dialuna na noreste di Bermuda den Laman Caribeño, segun un imagen di satelite obteni door di TankerTrackers.com. Un oficial di Merca a bisa Reuters diasabra cu e tanker no a wordo aborda y cu interceptacionnan por tuma diferente forma, inclui navegando of bula serca di barconan di interes. E barco yena Skipper, e prome cu a wordo confisca pa Estados Unidos e luna aki, a yega diasabra un area cerca di puerto di Galveston, Texas, pa transferi carga di petroleo, segun fuente maritimo. Guyana a bisa siman pasa cu e tanker a usa su bandera falsamente. Huntu, Skipper, Centuries y Bella 1 a exporta 41 miyon barril di crudo y fuel oil for di Iran y Venezuela den añanan reciente, segun TankerTrackers.com.