Problema cu e compania King Ocean, tin entrada di producto pa Aruba tranca

ORANJESTAD – Debi na un problema logistico cu e unico compania cu ta provee Aruba cu mercancia, King Ocean Services, awor ta parce cu importadornan tin problema pa ricibi e carganan aki. MAnera cu noticiacla a compronde, ta un solo compania/boto ta haci esaki. Loke a compronde cu a sosode, ta cu lo mas probable ta cu a ‘hack’ e sistema di e compania di King Ocean Services, cu ta nifica cu nan no por produci e asina yama ‘bill of lading’, y sin e documento ey, bo no por ‘klaar in’ na douane, cu ta nifica cu ningun producto por sali for di waf. Basicamente bisa, ‘nada no por drenta Aruba’. Y net den tempo di fiesta. 

AYUDO DI GOBIERNO

A compronde cu importadornan ta buscando ayudo di gobierno (lesa:minister) pa wak si por yuda e situacion pa asina toch por haci excepcion pa e mercancia drenta Aruba. Esaki mirando cu ta fin di aña y cu mester di productonan extra e temponan aki. 

KEN TA KING OCEAN SERVICES?

King Ocean Services ta un compania di transporte maritimo di carga, propiedad di un familia, cu ta specialisa den envio pa laman a lo largo di e Hemisferio Occidental. E compania ta ofrece servicio di FCL/LCL, carga refrigeri, vehiculo, carga pesado/proyecto y envio di efectonan personal, entre puerto di Florida y Centro America, Sur America y e Caribe. King Ocean Services ta atende diferente tipo di mercancia, manera maquinaria, material bruto y producto perecedero.