Gobierno di Aruba ta ricibi menos entrada, gasto ta subi

ORANJESTAD – Gobierno di Aruba a ricibi menos placa den e di tres cuartal di 2025 compara cu un aña atras, mientras cu e gastonan a subi. Esaki ta sali for di e raportahe cuartal di Banco Central di Aruba tocante finansa di gobierno. E entrada total di gobierno den e di tres cuartal a yega 468 miyon florin arubano. Esaki ta mas cu 71 miyon florin menos cu den e mesun periodo di 2024. E caida ta bin principalmente pasobra gobierno a ricibi menos entrada di impuesto. Especialmente e entrada for di impuesto riba ganashi a baha fuerte. Tambe a drenta menos via impuesto di salario y impuesto di transferencia. Na otro banda, algun otro impuesto a duna mas entrada, manera impuesto di venta, derecho di importacion y impuesto riba tera. Ademas, e entrada cu no ta di impuesto, por ehempel tasa y reembolso, tambe a subi.

MAS PLACA GASTA

Mes momento, gobierno a gasta mas placa. E gasto total a subi cu mas cu 27 miyon florin te 410 miyon florin. E subida aki ta principalmente debido na gasto mas haltu pa beneficio y subsidio. Den otro area, manera inversion y cumpra di mercancia y servicio, a wordo gastá menos. Costo di personal tambe a sigui subi. E gasto pa salario y costo relashona a yega casi 155 miyon florin. Dor di esaki, un parti mas grandi di entrada di impuesto a bai pa personal. Den e di tres cuartal di 2025, 42 por ciento di tur entrada di impuesto a wordo gastá riba costo relashona cu salario, mientras cu un aña atras esaki tabata apenas mas cu 32 por ciento. A pesar di e entrada mas abou y gasto mas halto, gobierno a cera e cuartal ainda cu un surplus. E surplus tabata 52 miyon florin, pero esaki ta hopi mas abou cu e surplus di 150 miyon florin den e di tres cuartal di 2024.