Di tres 'incidente' riba Corsou entre avion comercial y militar mericano

WILLEMSTAD /ORANJESTAD - Diamingo tabata atrobe tenso den shelo riba Corsou. Asina e portal hulandes NOS ta raporta diamars. Ta resulta cu diamingo  controladornan di trafico aereo a observa cu un avion di JetBlue (JBU373) tabata atrobe na curso pa topa un avion desconoci . Nan a adverti e piloto, kende for di cockpit a mira cu e avion desconoci  a pasa rapidamente bou di dje. “Oh e la bula bou di bo? Dios gracias.” – Control di trafico aereo Corsou a contesta e capitan. 

Cu pilotonan mester evita otro avion basando nan accion riba loke cu nan por mira cu wowo ta algo excepcional. Avionnan tin technologia pa evita colision. Specialmente: e transponder. E aparato aki ta manda codigonan unico na radar di controladornan di trafico aereo, pa nan por sa cu cua  avion nan ta tratando. Ademas, e ta manda informacion di posicion, altura y velocidad. Asina ta keda suficiente distancia entre avionnan y un avion por wordo sigui.

Un transponder ta manda y ta ricibi señal. Asina e por adverti otro pilotonan si nan ta bula demasiado cerca. Internacionalmente a wordo acorda cu avionnan semper mester tin nan transponder sendi.

Esey no tabata e caso den e incidentenan aki. Avionnan Mericano tabata bula cu nan transponder paga. Esaki ta comun pa avionnan militar, pa no revela nan posicion na adversarionan.

Consecuencia di esaki ta un riesgo serio pa seguridad den cielo riba Corsou. Pesei, riba 22 di november e autoridad di aviacion riba e isla a emiti un advertencia formal: “Atencion: tin trafico aereo desconocido, bula cu precaucion.” E autoridad di aviacion di Merca tambe a adverti e mes dia pa avionnan militar riba tur altura.