BCA: Gobierno di Aruba a logra baha debe considerablemente

ORANJESTAD – Gobierno di Aruba a logra baha su debe considerablemente den un periodo di un aña. Na fin di september 2025, e total debe di gobierno tabata 5,07 miyon florin Arubano. Un aña prome , e montante tabata ainda 5,57 miyon florin. Esaki ta sali for di e ultimo raportahe trimestral di Banco Central di Aruba. Esaki kier bisa cu den un aña, e debe di gobierno a baha cu mas cu 500 miyon florin. Converti na porcentahe, esaki ta representa un reduccion di mas o menos nuebe porciento. E bahada a ocuri pasobra Aruba ta debe menos placa tanto na creditornan for di pais como tambe na creditornan local. E debe externo a baha cu 336 miyon florin. Specialmente e montonan cu Aruba mester a paga bek na otro paisnan, manera Merca y Hulanda, a bira mas chikito.

DEBE INTERNO

Tambe e debe interno a baha, cu casi 165 miyon florin. Esaki ta principalmente pasobra gobierno tin menos prestamonan di largo plazo cu, entre otro, partidonan priva y Fondo General di Pension Aruba. Ademas, algun debe di corto plazo tambe a wordo paga. Na mes momento, gobierno a pidi un tiki mas placa via obligacionnan di estado. Esakinan ta prestamonan cu ta wordo emiti riba mercado y cu inversionistanan ta cumpra. Pero e subida aki a wordo ampliamente compensa pasobra gobierno a usa menos prestamonan di corto plazo, manera papel di tesoreria. Banco Central ta nota cu, apesar di esaki, e espacio financiero di gobierno a bira mas limita. E sobrasaliente – e cantidad di placa cu gobierno ta keda cu dje despues cu tur gasto a wordo paga – a yega 52 miyon florin den di tres cuartal di 2025. Un anja prome , e monto aki tabata ainda 150 miyon florin.