Avion di JetBlue a hera dal den un avion militar mericano den pleno buelo cerca di Corsou

WILLEMSTAD (NOS) -  Den e espacio aereo di Corsou, diabierna anochi casi dos avion a dal den otro. Asina un raportahe di e agencia di noticia hulandes NOS ta raporta. Segun e pilotonan di un avion di e aeroliña JetBlue, nan mester a haci maniobra pa evita dal den otro durante nan subida, pasobra un avion militar di Merca a pasa cerca di nan ruta di buelo. Esaki ta resulta for di grabacionnan publico di comunicacion entre cockpit y control di trafico aereo.

E tabata JetBlue buelo 1112 cu tabata bai di Corsou pa aeropuerto JFK na New York. E incidente a pasa den espacio aereo di Corsou, 26 minuut despues di salida. E tripulacion di e compania aerea mericana a informa control di trafico aereo cu un avion militar tankero di Merca tabata ta bula na distancia hopi corta, dilanti di e ruta di buelo, riba mes nivel di altitud.

“ACTUA DEFENSIVAMENTE”

E pilotonan a indica cu pa 17.04 ora local nan mester a corta nan subida pa wanta distancia. Den e comunicacion ta scuchja cu e pilotonan ta papia di un ‘near collision (dalmento di dos avion den otro den pleno buelo). Nan a bisa cu nan mester a actua defensivamente pa evita un dalmento. Den dato di radar di buelo online ta mira cu e buelo di JetBlue a stop di subi hustamento na momento cu e incidente a wordo reporta.

E directora di DC-ANSP, cu ta responsabel pa control di trafico aereo riba Corsou, a laga sa cu nan ta na altura di e incidente cu JetBlue buelo 1112. Debi cu investigacion ta andando, e no por haci declaracion mas detaya ainda. Si, e la confirma cu JetBlue lo reporta e incidente na autoridad aerea di Merca, FAA.

“ESAKI TA UN ESCANDALO”

Segun e tripulacion, e avion militar tabata ta bula sin transponder active (aparato cu ta manda señal di idenficacion pa otro) . “Esaki ta un escandalo”, un di e pilotonan a bisa den e grabacionnan di audio. Control di trafico aereo di Corsou a confirma cu e avion no tabata bisto riba radar.

Control di trafico aereo a pidi disculpa y a indica cu e incidente lo wordo registra. Nan a pidi e pilotonan pa haci un raportahe oficial.

Un avion militar tanker tin un reserva extra grandi di combustible bordo. A traves di un tubo largo, otro avionnan di forza aereo por wordo reabasteci sin cu nan mester atriza.

E tripulacion di JetBlue a bisa cu despues di e casi-colision, e avion militar a sigui direccion nordoost, pa espacio aereo venezolano. JetBlue buelo 1112 tabata wordo opera cu un Airbus A320-232. E tipo di avion aki ta adapta pa mas o menos 150 pasahero. Por scucha e combersacion entre piloto y toren di Corsou AKI.