Secretario di estado van Marum tampoco tabata na altura cu Machado a sali di Venezuela via Corsou

DEN HAAG – No ta prome minister di Corsou so, Gilmar Pisas no tabata na altura di e operacion pa saca e lider opositor venezolano Machado for di Venezuela, via Corsou e siman aki. Den un conferencia di prensa diabierna mainta, secretario di estado hulandes pa asuntonan di Reino Eddy van Marum tambe a admiti cu e no tabata na altura di esaki. “Wij waren niet op de hoogte, teminste ik weet daar verder niks van!” e mandatario a declara na un periodista di Corsou cu a hacie e pregunta en cuestion. Ora cu a sigui puntre, e la mustra cu minister di asuntonan di relacionan exterior a bisa cu e no por a bisa nada riba e asunto, y cu ta operacionan cu ta ultra secreto. E mandatario a ‘tira’ tur cos riba Merca, y informa cu Hulanda tin contacto diplomatico cu Merca, pero cu no tabata duna informacion riba e tema aki. 

PISAS

E huida di Machado a causa consternacion y indignacion cerca prome minister di Corsou, mirando cu como prome mandatario, e mes no tabata na altura di e operacion asina grandi, cu por tin hopi implicacion pa e isla. Ora cu prensa local a puntre e siman aki riba e tema, e la admiti cu e no tabata na altura, y cu e ta bay busca mas informacion y cu e ta indigna riba e asunto, pasobra por a compronde awor cu a ‘lage den scuridad’. Esey ta si tin cu kere tur loke ta wordo bisa. Hopi ta bisa cu ta imposibel cu riba e nivel ey, tanto e mandatario hulandes como di Corsou, no tabata na altura di algo grandi asina y cu por tin implicacion asina grandi pa e isla. Esaki pasobra esaki por wordo mira como cu Corsou ta ‘sostene’ Merca riba e asunto aki y cu Venezuela por tuma ‘represaya’ contra e isla(nan) di un forma of otro, unabez   un guera entre Merca y Venezuela mester inicia. Por scucha e declaracion di e mandatario AKI