Rutte ta adverti pa guera contra Rusia: ‘Nos ta siguiente blanco di Rusia’

BERLIN - “Nos mester ta cla manera glas tocante e amenaza: nos ta e siguiente blanco di Rusia – y nos ya ta den peligro.” Secretario-general di NATO, Rutte, a reafirma un biahe mas cu Rusia ta representa un peligro grandi pa e miembronan di e alianza militar. E la bisa esaki den un discurso na un conferencia di seguridad den Berlin.

E discurso ta yega algun dia despues di publicacion di e strategia nobo di seguridad nacional di Merca, e pais cu siempre ta tin e papel mas importante den e alianza. Bao presidencia di Trump un direccion totalmente diferente ta wordo tuma. Den e documento ta para cla , entre otro, cu mester evita cu NATO ta sigui amplia sin limite. Esaki ta exactamente e deseo di presidente ruso Poetin, cu Merca ta desea reestablece contacto cu dje. Merca tambe a critica e Union Europeo.

Pero pa Rutte ta cla y limpico ken ta e enemigo, mescos cu e  ta intenta den su discurso pa navega cu cuidao y no trapa riba dede di mericanonan. Pesey ta e motibo cu e la duna Trump un compliment.

“Te awor Poetin solamente a actua manera pacificador ora cu e  tin gana, pa gana mas tempo pa continua su guerra. Presidente Trump awor ke pone un fin na e derrame di sangre. E ta e unico cu por logra pone Poetin na mesa di negociacion.”