Jonckheer: Tension den region ta afecta turismo na Corsou

WILLEMSTAD – E situacion den region entre Merca y Venezuela tin hopi hende preocupa. E cos mas malo ta cu ningun hende sa kiko ta bai pasa. Asina Billy Jonckheer a bisa den e podcast 3or cu Gino. Jonckheer ta indica cu e ta riba cierto plataforma social caminda practicamente tur dia ta haci pregunta si ta sigur pa biaha den region di Caribe. “Mi sa di hende cu a cancela nan biahe pa Corsou debi na e situacion. Mi sa di hendenan cu a cancela nan reservacion pa bai pisca riba boto pasobra nan tin miedo pa sali riba laman.” Segun Jonckheer, tin hende asta ta duda pa bai Klein Corsou. “E situacion ta feroz y ta afecta turismo di Corsou.” Con grandi e efecto aki ta, Jonckheer no por bisa ainda, pero e ta anticipa cu cuanto mas grandi e problema entre Merca y Venezuela bira, ta mas grandi e impacto riba turismo di Corsou lo ta.

Un otro ehemplo di efecto negativo ta esun tocante espacio aereo. Avionnan cu ta bula ehemplo Brazil–Corsou tin cu haci un stop pa tenc combustible atrobe riba nan ruta pa Corsou. Esaki pasobra no por pasa mas den espacio aereo di Venezuela. “Pasa rond di Venezuela por bira un impacto negativo pa turismo di Corsou. Buelta pa Colombia tambe ta dura 30 minuut mas pasobra no por pasa mas den espacio aereo Venezolano.” E punto di incertidumbre mas grandi ta presidente mericano mes, Donald Trump, segun Jonckheer, y e ta spera cu por solucion e situacion cuanto mas lihe por. Mas ainda, Jonckheer ta bisa cu tin hopi speculacion riba kiko ta bai pasa. “Ta dificil sa kiko ta informacion berdadero.” Personalmente, Jonckheer ta pensa cu influencia di China den region ta pone Merca preocupa y nan ke actua contra esaki kaminda Venezuela kisas ta e prome paso. Un otro aspecto cu ta hunga un rol, segun Jonckheer, ta e riqueza di Venezuela. No ta solo pa e rezervanan di petroleo, pero Venezuela tin tambe hopi mineral den su tera cu ta importante pa industria moderno manera produccion di chip electronico. Esaki ta hasi Venezuela un zona estrategico pa Trump.

E echo cu Merca ta sostene politico di derecha den diferente pais den region, pa Jonckheer ta un indicacion di kico ta plan di e presidente mericano pa e zona di Sur America y Centro America. E tin duda sinembargo cu Merca lo logra pone un hende di derecha na gobierno di Venezuela, pasobra e no ta mira lidernan manera esei den pais. “Pero Trump lo tin interes pa pone un lider cu Merca por hasi negoshi mas fasil cune,” asina Jonckheer a caba bisa.