Compania di rescate mericano ta na Aruba, preparando pa posibel atake mericano na Venezuela

TAMPA – Un organizacion di rescate di Tampa a activa un operacion di emergencia anticipando posible accion militar di Merca contra Venezuela, posicionando ekipo den e Caribe pa yuda mericanonan cu por mester evacuacion.  Grey Bull Rescue a lansa “Operation: LATIN SHIELD” como respuesta na e tension cu ta subi entre Merca y Venezuela. Su fundador Bryan Stern den un entrevista na un canal local di Tampa na Florida, a bisa cu ekipo ta riba un standby na Aruba mientras nan ta prepara pa posible accion terrestre contra Venezuela. E activacion a yega despues cu Merca a hasi atake mortal contra botonan cu ta sospecha di trafico di droga cerca Venezuela, loke aumenta e tension aun mas den region. Stern ta estima cu tin entre 20 mil te 30 mil mericanonan actualmente den Venezuela cu por mester yuda pa evacuacion. Segun Stern: “E ehercito di Merca ta scohe un pelea cu hende malu. E hende inocente cu ta keda den centro — eseinan ta nos preocupacion.”

Grey Bull Rescue a completa mas cu 800 mision mundialmente, salbando mericanonan den situacion di crisis. Nan tin mas cu 150 persona cla pa respuesta rapido. Stern a bisa cu si un conflicto bira real: “Lo tin un gran susto y panico di e no conoci.”

REACCION DI COMUNIDAD VENEZOLANO DEN TAMPA

E tension ta keda sinti den Tampa Bay entre venezolano cu a huy for di nan pais. Leon Granado, presidente di Venezuela USA Foundation, a bisa cu e ta sperando liberacion di su pais, pero e ta preocupa pa venezolano cu no tin ningun hende pa defende nan. Segun informacion di agencia di refugianan di ONU, casi 8 miyon persona a sali for di Venezuela desde 2014.