Bureau Ombudsman oficialmente a cuminsa brinda servicio na comunidad

Bureau Ombudsman oficialmente a cuminsa brinda servicio na comunidad

Posted on 12/1/2025 3:42 pm AST | Updated on 12/1/2025 3:42 pm AST

ORANJESTAD- Desde awe 1 di december 2025, Bureau Ombudsman a habri porta pa por brinda servicio na comunidad. 

TRAYECTO AMPLIO TE CU 1 DI DECEMBER 2025

Despues di a nombra mr. sra. Jurima Bryson como e prome Ombudsman di Aruba 1 di oktober 2024, inmediatamente a cuminsa cu preparacion pa por instala e oficina y forma e team di Bureau Ombudsman. Cu dedicacion di e team, ayudo local y internacional, Ombudsman di Aruba a logra pone un fundeshi firme den un tempo relativamente corto pa un institucion encarga cu trato di keho di comunidad den forma independiente y imparcial. 

SERVICIO DI BUREAU OMBUDSMAN 

Desde 1 di december 2025, e ciudadano por acerca Bureau Ombudsman ora nan tin un keho contra un instancia. Den cuadro di e Ley ‘Landsverordening Ombudsman’, un ciudadano por entrega un keho contra e siguiente instancianan: 

-        organonan administrativo;

-        entidadnan huridico cu gobierno a institui;

-        companianan estatal;

-        organisacionnan priva cu tareanan di interes general y cu ta ricibi placa di gobierno; 

-        organisacionnan priva cu ta ehecuta tareanan cu mucha y hoben (tur persona te cu 17 aña) riba tereno di enseñansa, ayudo y guia, cuido, cuido medico; y

-        tambe tur e empleadonan di dicho instancianan, hasta si e relacion di trabou a termina caba.

 

PROME CU E CIUDADANO POR HACI UZO DI E SERVICIO DI BUREAU OMBUDSMAN 

Tur hende por entrega un keho contra un instancia segun Ley cerca Ombudsman. Ademas, pa por entrega un keho cerca Ombudsman, e ciudadano mester a entrega su keho cerca e instancia concerni prome. Si esaki no a sosode, no por haci uzo di e servicio di Bureau Ombudsman ainda.

 

INFORMACION GENERAL  

Bureau Ombudsman ta habri di dialuna pa diabierna: 

-        Dialuna y diabierna

Sin cita 8:30 – 11:30

Cu cita 14:00 – 15:30

-        Diaranson 

Sin cita 8:30 – 11:30

Merdia: cera pa publico

-        Diamars y diahuebs

Cu cita 8:30 – 11:30

Sin cita 14:00 – 15:30

 

Bureau Ombudsman ta situa na Caya G.F. Betico Croes 149, Oranjestad, Aruba.

Telefon ta +297 281 6800 y por mail na [email protected].

Por entrega un keho directamente via e portaal di Ombudsman via e website.

  • Powered by SETAR