Polis ‘porfin’ a reconoce victima di asesinato na Solito

ORANJESTAD -  Despues di casi 5 dia cu polis a drenta un cas na Solito, nan por a divulga loke prensa ya caba a publica for di comienso, esta e identidad di e persona y cu ta trata di un asesinato. Segun polis, ‘investigacion riguroso ta andando keto bay di e caso di asesinato na un adres na Solito’. 

IDENTIFICA 

Cuerpo Policial a informa oficialmente diaranson numa ‘cu den oranan laat di ayeratardi (esta diamars atardi:red)  a identifica e victima di e caso di diasabra na unda a haya un curpa sin bida den un cas na Solito. 

KEN E PERSONA TA 

Ta trata di e victima señora Luz Divina Faña Paulino naci dia  7 april 1965 (60 aña di edad) di Republica Dominicana. Informacion cu ya caba tabata circula for di un dia despues cu e curpa mutila a wordo haya. Loke cu polis no ta bisa, ‘ainda’ ta cu a haya e curpa tur mutila, esta na pida pida, den e freezer. 

FALTA DI INFORMACION

Noticiacla dialuna caba a presenta un analisis riba e tema, unda cu a toca e parti unda cu informacion ta wordo haya di otro forma y polis ainda tabata keto keto riba e tema. Informacion cu tabata circula for di comienso, tabata cu e curpa a wordo haya tur mutila, y cu tabatin nomber di e victima, y hasta su edad. Pero polis apenas diamars atardi, a logra haya e informacion aki. 

APELACION

Cuerpo Policial ta haci un apelacion pa e persona cu sa algo of a wak algo yama e tiplijn di polis cu ta 11141. Nos ta garantisa cu bo ta keda ANONIMO.