Corte: Tratamento di apelacion caso Flamingo ta na juni 2026

ORANJESTAD – Hueznan di Corte Superior dialuna a determina cu e tratamento integral di e apelacion di caso Flamingo ta cuminsa dia 1 di juni 2026 y pa cual a reserva un siman completo pa trata esaki si mester. Dialuna a trata e asina yama regie zitting unda cu e defensa a haya practicamente tur nan peticionan aproba, cu ta mas bien pa scucha un cantidad mas di testigo. 

E CASO

E caso grandi aki ta referi a complicidad di abuso di funcion, complicidad di engaño y complicidad di corupcion pasivo, y a cuminsa na aña 2022 cu detencion di e sospechoso principal, esta ex minister y parlamentario Otmar Oduber. Banda di e politico prominente aki, siete otro sospechoso a wordo persigui, incluso cuatro funcionario publico. 

DESEO

Durante e tratamiento di awemainta defensa a entrega varios deseo di investigacion. Corte Superior di Husticia a aproba varios nan peticionnan pa scucha testigo. 

APELACION

Na februari di e aña aki, Ministerio Publico a bay den apelacion contra e sentencianan cu Corte den Prome Instancia a dicta contra Oduber y contra e sospechoso E.F.E., un funcionario publico. Nan dos, plus un tercer sospechoso, tambe a bay den apelacion contra nan sentencia.

CONDENA 

Riba 22 di januari 2025, Corte den Prome Instancia a condena Oduber pa complicidad di engaño, intento di engaño contra Pais Aruba y abuso di su funcion como minister den e periodo 2017–2020. E la haya un castigo di prison di 1 aña, di cual 319 dia ta condicional, y ademas 240 ora di trabao pa comunidad. 

Pa algun hecho, incluso corupcion pasivo, el a wordo declara liber. Corte a declara e sospechoso E.F.E. liber di tur tres hecho di cual e tabata wordo acusa. A keda palabra awe cu Corte Superior di Husticia lo trata e caso Flamingo den su contenido riba prome di juni 2026.