Comediante y comerciante Jandino Asporaat a habri e prome zipline di Corsou

WILLEMSTAD – Zipline Adventures, funda pa Jandino y Kenneth Asporaat, a bira un realidad. Den weekend pasa tabata e apertura pa invitadonan, y for di awor tur hende por reserva pa conoci Banda Bou for di riba sero. Tin seis zipline, diferente halto, y un largura total di casi un kilometer, cu un bista panoramic di Playa Santa Cruz y Laman Caribe. Durante e paseo, lo pasa riba bunitesa natural impresionante y habitat unico di Hofi Mango. Esaki ta un soño cu a bira realidad di rumanan Asporaat. Nan kier a crea algo cu ta emocionante, ta yena nos cu orguyo, y ta mustra cu bonita Corsou ta.

Diasabra pasa den presencia di minister Charles Cooper a corta e sinta y a brinda pa e actividad nobo aki pa nos isla. Diferente invitado por a reserva delanta pa tambe por a keda conoci cu Zipline. Esaki ta algo grandi pa Corsou.

SESENTA MINUUT DI AVENTURA

Bishitantenan ta cuminza nan aventura for di e plataforma halto di lansamento cu bista riba serunan di Banda Bou, e kunuku di mango y laman. E experiencia completo, for di preparacion te na aterrisahe, ta dura mas o menos sesenta minuut. Cu apertura di prome zipline di Corsou, Jandino y Kenneth kier mustra cu aventura y cultura di isla por cana man tene. E atraccion ta adecuado pa tanto esnan cu gusta aventura y riesgo, como tambe esnan cu ta prefera sinta y wak mientras nan ta bebe un bebida fresco. Zipline Adventures Corsou ta situa den parque historico di Hofi Mango. Cada carchi di entrada pa zipline ta inclui entrada gratis pa Parque Hofi Mango, caminda naturalesa y historia ta bini huntu. Bishitantenan por cana dor di e kunuku antiguo di mango, eksplora e molino di suku historico, y bishita e destileria mas bieu di isla, cu ta data for di 1707.