Detencion di coordinador y miembro di partido AVP prolonga

ORANJESTAD – Detencion di e coordinador y miembro di partido politico AVP, C. James y su pareha J.W.  a keda prolonga ‘djis pa investigacion’, segun vocero di ministerio Publico, Ann Angela diabierna atardi pa noticiacla. Manera cu noticiacla a raporta anteriormente, diahuebs polis a detene James y su pareha na San Nicolas, riba sospecho di supuesto robo. Awe diabierna, lo mester a dicidi riba su caso y si e ta recobra su libertad of ta keda deteni. Atardi laat, a drenta e confirmacion cu su detencion tabata prolonga. 

E CASO

Diahuebs, e portal 24ora a raporta cu James, a keda deteni, riba sospecho di robo. E informacion publica ta cu e, hunto cu su pareha J.W., lo a horta placa di e suegra di James. E detencion lo a tuma lugar despues cu e mama di e dama JW a haci denuncia. E mama lo a haci un declaracion publico, pa cual James lo a bay reacciona riba e noticia ey, alegando cu e tabata incorecto. Pero cu e reaccion nunca a yega, pasobra e mes a lo a keda deteni. E pareha lo a keda deteni na San Nicolas. 

JAMES TA TRAHA CU PROME MINISTER

Loke ta hala atencion ta cu apenas e siman aki ainda, James a presenta durante un conferencia di prensa pa papia riba e tema di ayudo pa Jamaica, relaciona cu e ultimo horcan cu a asota e isla. James, cu ta desendiente di Jamaica, a lidera e operacion aki y como tal a presenta esaki tambe publicamente. Durante e ultimo eleccion, James tabata riba e lista berde, como number 16 y a logra 106 voto. 

CASO MEP

Mesora hende a compara e caso cu esun di ex chauffeur di ex prome minister Evelyn Wever Croes, esta Siki Koolman, cu recientemente a haya castigo di prison pa a viola dos menor di edad sexualmente. Un caso cu a hala hopi atencion mirando cu e tabata hopi cerca di e prome minister di e tempo ey, sin cu e prome minister e tempo ey tabata na altura. Awor atrobe, ta sosode algo asina, den luz negativo unda cu un persona cu ta traha directamente bou di prome minister actual, Mike Eman, ta haye den problema cu husticia tambe.